«Ի պատիւ մեր ուժային կառոյցների՝ ՆԳՆ-ի եւ Ազգային Անվտանգութեան, խնդիրը լուծարուեց, բայց դա մեզ, բնականաբար, մտածելու տեղիք է տալիս», Ազգային Ժողովի Պաշտպանութեան եւ անվտանգութեան հարցերի մշտական յանձնաժողովին ըսաւ յանձնաժողովի նախագահ Անդրանիկ Քոչարեանը՝ անդրադառնալով նախօրէին երկրին ներսը ստեղծուած տագնապալի իրավիճակին, երբ ոստիկանական բաժիններէն մէկե ներխուժած էին զինուած մարդիկ:
Դիմելով ԱԱԾ տնօրէն Արմէն Աբազեանին՝ Անդրանիկ Քոչարեան ըսաւ, որ փաստօրէն տուներուն մէջ դեռ շատ զէնք կայ: «Շնորհաւորում եմ մեզ երէկուայ արագ բացայայտումների համար. համոզուած են, որ ամբողջ գիշեր աշխատանք է տարուել, եւ ՀՀ-ում որեւէ զինուած ապօրինի խմբաւորում չի կարող լինել, թաքնուած զէնք չի կարող լինել. հին ասացուածք կայ՝ պատից կախուած զէնքը մի օր կրակում է: Այդ կրակոցները չեն կարող մեր ներսում լինել, որովհետեւ մենք ունենք բազմաթիւ խնդիրներ, որի լուծմանը պէտք է միտուած լինենք, անվտանգային խնդիրներ, եւ մենք պէտք է ամուր զգանք մեր երկրի ներսում», ընդգծեց Անդրանիկ Քոչարեանը եւ յաւելեց, որ գոնէ պէտք է յարգանքով վերաբերիլ «Եռաբլուր»-ին: «Այսօր մտնել եւ պահանջներ դնել պետութեան առաջ, որեւէ երկիր չի հանդուրժի: Ես համոզուած եմ, որ ամբողջ գիշեր բոլորը իրենց մաշկի վրայ զգացին, որ պէտք է սթափուեն», նշեց Անդրանիկ Քոչարեանը:
