Քրեմլինը կասկածելի կը համարէ Եւրոմիութեան դիտորդական առաքելութեան արդիւնաւէտութիւնը հայ-ատրպէյճանական սահմանին։ Լրագրողներու հետ զրոյցին, Ռուսիոյ նախագահի մամուլի քարտուղար Տմիթրի Փեսքով այսպէս մեկնաբանած է Հայաստանի խորհրդարանին կողմէ դիտորդներուն անձեռնմխելիութիւն տրամադրող համաձայնագրին վաւերացումը, ինչպէս նաեւ առաքելութեան ընդլայնումը։
«Այստեղ, թերեւս, պէտք է կասկածի տակ դնել նման առաքելութեան հաւանական արդիւնաւէտութիւնը… Հարցը այն է, թէ որն է դիտորդութեան առարկան, եւ արդեօք այդ առաքելութիւնը կը ճանչցուի՞ Ատրպէյճանի կողմէ: Եթէ մենք ճիշդ կը հասկնանք, ատրպէյճանական կողմը բաւականին բացասաբար կը վերաբերի այս առաքելութեան գործառույթներուն, եւ ես կը կասկածիմ, որ նման մանտաթը այնտեղ ըմբռնումով պիտի ընդունուի», ըսած է Փեսքով։
Քրեմլինի ներկայացուցիչը ԵՄ առաքելութեան տեղակայման եւ գործունէութեան ծիրին մէջ հայկական կողմին գործողութիւնները անուանած է «Երեւանի միակողմանի որոշում»։ Հայաստանի խորհրդարանը Մարտ 20-ին վաւերացուցած է «Հայաստանի Հանրապետութեան եւ Եւրոմիութեան միջեւ Հայաստանի մէջ ԵՄ առաքելութեան կարգավիճակին մասին» համաձայնագրին նախագիծը։
