Նախագահի ընտրութիւններով պայմանաւորուած Արցախի Հանրապետութեան ԱԱԾ-ն տարածած է հաղորդագրութիւն մը:
«Յարգելի հայրենակիցներ, Սեպտեմբերի 9-ին ԱՀ ԱԺ կողմից ԱՀ նախագահի ընտրութիւններով պայմանաւորուած հանրապետութիւնում ստեղծուել է ներքաղաքական լարուած իրադրութիւն: Միաժամանակ տարբեր քաղաքական ուժեր, իրավիճակից օգտուելով, հաւաքների եւ ցոյցերի անցկացման կոչեր են անում, այդ կերպ փորձելով ապակայունացնել իրավիճակը։
Տեղեկացնում ենք, որ ԱՀ Ազգային Անվտանգութեան Ծառայութիւնը օրէնսդրութեամբ իրեն վերապահուած գործառոյթների եւ լիազօրութիւնների շրջանակում ձեռնարկելու է բոլոր միջոցները ԱՀ Սահմանադրական կարգը պահպանելու համար։ Սահմանադրական կարգի տապալմանն ուղղուած սպառնալիքների դէպքում ազգային անվտանգութեան ծառայութիւնը պատրաստ է վճռական գործողութիւնների։
Երկիրը ցնցումների տանելու յայտարարութիւններ անող քաղաքական ուժերի ներկայացուցիչներին ու առանձին անձանց կոչ ենք անում սթափուել եւ Արցախի Հանրապետութեան համար այս վճռորոշ ու օրհասական պահին վտանգի տակ չդնել մեր պետականութիւնը։
ԱՀ քաղաքացիներին յորդորում ու խնդրում ենք չտրվել սադրանքների, ցուցաբերել սառնասրտութիւն ու բարձր քաղաքացիական գիտակցութիւն եւ յարգել ԱՀ Սահմանադրութիւնն ու օրէնքները»։
