Հայաստանի վարչապետն ու նախագահը շնորհաւորած են Աշխատանքի եւ աշխատաւորներու համերաշխութեան միջազգային օրուան առթիւ:
Վարչապետը Նիկոլ Փաշինեան իր ուղերձին մէջ համոզմունք յայտնած է՝ աղքատութիւնը հնարաւոր է յաղթահարել միայն աշխատանքով՝ զուգորդուած կրթութեամբ եւ որակաւորման բարձրացմամբ եւ յաւելած՝ «կառավարութեան ջանքերն ուղղուած են միջին սերնդի ներկայացուցիչների համար վերապատրաստումների, որակաւորման բարձրացման հնարաւորութիւններ ու խրախուսանք ստեղծելուն»:
«Աղքատութեան յաղթահարման ճանապարհին ամենակարեւոր երկարաժամկէտ անելիքը կրթութեան ոլորտի՝ նախադպրոցական կրթութեան, հանրակրթութեան, մասնագիտական կրթութեան եւ ուսուցման, բարձրագոյն եւ յետբուհական կրթութեան բարեփոխումներն են՝ այն նպատակադրմամբ, որ կրթական համակարգը պէտք է բացայայտի մարդու տաղանդը, նրան սիրած աշխատանքով զբաղուելու եւ աշխատանքի մէջ երջանիկ լինելու, ազատ եւ բարեկեցիկ ապրելու հնարաւորութիւն տա»,- նշած է Փաշինեան:
Վարչապետը նաեւ իր ուղերձին մէջ ընդգծած է. «Իմ համոզմունքն է, որ իւրաքանչիւր մարդ տաղանդաւոր է, եւ պատշաճ կրթութիւնը կարող է բացայայտել նրա տաղանդն այնպէս, որ մարդն աշխատանքով իր բարեկեցութիւնը կառուցելու հնարաւորութիւն ունենայ: Ոչ աշխատունակ կամ սահմանափակ աշխատունակ մարդկանց պարագան բոլորովին այլ իրադրութիւն է, չնայած վերջին խմբի մեր համաքաղաքացիներին էլ ասուածն առնուազն որոշ մասով կարող է առնչուել: Ինչ վերաբերում է աշխատանքային իրաւունքներին՝ կարեւորագոյն այս խնդրի լուծումը ոչ միայն պատշաճ օրէնքների ու կարգաւորումների մէջ է, այլեւ գործատուների եւ գործաւորների շահագրգիռ եւ գիտելիքահեն յարաբերութիւնների»:
Նախագահ Վահագն Խաչատուրեանն ալ նշած է՝ «մեր անկախ պետականութիւնն էլ իւրատեսակ աշխատանքի արդիւնք է»:
«Մեր պետականութիւնն անցած աւելի քան երեք տասնամեակի ընթացքում դիմագրաւել է բազմաթիւ փորձութիւնների եւ մարտահրաւէրների՝ պատերազմների, տնտեսական ճգնաժամերի, հասարակական-քաղաքական կեանքում շրջադարձային փոփոխութիւնների: Այդ դիմակայութիւնը, թէկուզ եւ լարուած ճիգով, ցոյց է տալիս, որ բոլոր խնդիրները հնարաւոր է լուծել միասնական ու անձնուէր աշխատանքի ու պատասխանատուութեան միջոցով, – ընդգծած է ան եւ յաւելած, – մեր պետութեան բարեկեցութեան ու զարգացման գլխաւոր գրաւականը բոլորիս՝ պաշտօնեայի, զինուորականի, բանուորի ու գիտնականի, ուսուցչի ու արհեստաւորի ստեղծագործ, անդուլ ու միասնական աշխատանքը, որի արդիւնքում էլ կերտւում է զարգացած, ժողովրդավար ու բարգաւաճող Հայաստանի Հանրապետութիւնը»:
