Ազգային Ժողովի «Քաղաքացիական Պայմանագիր» խմբակցութեան պատգամաւոր Անուշ Քլոյեան Ֆէյսպուքի իր էջով անդրադարձած է Ռոպերթ Քոչարեանի՝ դատարանի դահլիճին մէջ ըրած արտայայտութիւններուն։
«ՌՔ-ն այսօր դարձեալ դատարանում յայտարարել է, որ մինչեւ հիմա չի հասկանում, թէ ինչի համար են իրեն մեղադրում, եւ ինքը բարեխղճօրէն կատարել է իր պարտականութիւնները։
«Այս մարդը առաջին անգամ չէ, որ անպատկառ յայտարարութիւններով է հանդէս գալիս։ Լկտիութիւնն իսկապէս չափ ու սահման չունի։
«Նախ 2008թ.-ի ընտրութիւնները չեն եղել ազատ, արդար եւ թափանցիկ։ Բոլորի աչքի առաջ իրականացւում էին ընտրակաշառքի բաժանում, քաղաքացիների նկատմամբ ճնշումներ ու սպառնալիքներ, քուէատուփերի փոխարինում, լցոնումներ եւ ընտրական գործընթացի կոպիտ խախտումներ։
«Դրանից յետոյ էլ հրապարակուեցին այնպիսի արդիւնքներ, որոնք չէին արտայայտում ժողովրդի իրական կամքը։
«Այսօր էլ դատարանի դահլիճում հերթական անգամ փորձում էք խեղաթիւրել իրականութիւնը։ Փաստացի ընդունում էք, որ բարձրաստիճան զինուորականների հետ կատարել էք այն գործողութիւնները, որոնք, ըստ ձեզ, բխում էին ձեր պարտականութիւններից։ Սակայն հարց է առաջանում՝ արդեօք նախագահի պարտականութի՞ւնն էր խաղաղ ցուցարարների նկատմամբ մահաբեր եւ անհամաչափ ուժի կիրառումը։
«Ստում էք, երբ յայտարարում էք, թէ ժողովուրդը յարձակուել էր նախագահականի վրայ։ Իրականութիւնն այն է, որ խաղաղ ցուցարարները նստացոյց էին իրականացնում, եւ վաղ առաւօտեան ուժայինները յարձակուեցին քնած մարդկանց վրայ՝ կիրառելով բռնութիւն։ Աւելին՝ խաղաղ ցուցարարները չեն գրոհել որեւէ պետական նշանակութեան շէնք, առաւել եւս՝ նախագահականի վրայ։
«Ամօթ է տարիներ անց շարունակել հերքել ակնյայտ փաստերը։ Ի վերջոյ, դուք եղել էք Հայաստանի Հանրապետութեան նախագահը, եւ այդ պաշտօնը ենթադրում է պատասխանատուութիւն սեփական որոշումների ու գործողութիւնների համար։
«Ունեցէք քաղաքական եւ մարդկային պատասխանատուութիւն՝ ընդունելու կատարուածը եւ պատասխան տալու այն գործողութիւնների համար, որոնց հետ կապուած իրաւական վճիռ է կայացրել ՄԻԵԴ-ը»,- գրած է ան։
