Վերջին շրջանին արեւմտեան էմիսարները զգալի աշխուժացած են Հայաստանի ուղղութեամբ. անոնք մասնաւորապէս յառաջ կը մղեն ՆԱԹՕ-Հայաստան անհատապէս ընկելացուած համագործակցութիւնը։
Այս մասին ճեպազրոյցին ըսած է Ռուսիոյ Արտաքին գործերու նախարարութեան խօսնակ Մարիա Զախարովան:
«Անոնք ջանքեր կը գործադրեն Մոսկուա-Երեւան կապերը վարկաբեկելու, իսկ լաւագոյն տարբերակով զանոնք ամբողջովին խզելու ուղղութեամբ: Արեւմտականները այդ ընդհանրապէս չեն թաքցներ: Իսկ հիմա ալ կը փորձեն սեպ խրել Պաքուի հետ մեր գործընկերային յարաբերութիւններուն մէջ: Այսինքն՝ անոնց նպատակներուն շրջանակը լայն է», ըսած է Զախարովան:
Ան յաւելած է, որ ՆԱԹՕ-ն՝ որպէս դաշինք, հետաքրքրուած չէ Հարաւային Կովկասի մէջ խաղաղութեան հաստատմամբ:
Աւելի վաղ Զախարովան յայտարարած էր, թէ ՆԱԹՕ-ն առաւելագոյն նպատակ դրած է Ռուսաստանի դէմ երկրորդ ճակատ բանալ Հարաւային Կովկասի մէջ եւ ընդհանուր առմամբ թէժացնել իրավիճակը տարածաշրջանին մէջ։