Պաքուի Արտաքին Գործերու Նախարարութիւնը յայտարարած է, որ կը հրաժարին Ուաշինկթընի մէջ Հայաստանի եւ Պաքուի արտաքին գործերու նախարարներու հանդիպումէն։
Պաքուի Արտաքին Գործերու Նախարարութիւնը նախ արձագանգած է ԱՄՆ Գոնկրէսի Ներկայացուցիչներու պալատի արտաքին յարաբերութիւններու յանձնաժողովին մէջ տեղի ունեցած լսումներու ժամանակ ԱՄՆ պետական քարտուղարի Եւրոպայի եւ Եւրասիոյ հարցերով օգնական Ճէյմզ Օ’Պրայընի յայտարարութիւններուն՝ զանոնք անուանելով «կողմնակալ, անարդիւնաւէտ, անհիմն եւ անընդունելի»:
Պաքուի մէջ դժգոհութեան ալիք բարձրացուցած է Օ’Պրայընի այն յայտարարութիւնը, որ ԱՄՆ-ն չեղարկած է բարձրաստիճան այցերը Ատրպէյճան, իսկ այդ երկրին հետ ԱՄՆ-ի յարաբերութիւնները չեն կրնար բնական ըլլալ, քանի դեռ ԱՄՆ յառաջընթաց չէ տեսած խաղաղութեան բանակցութիւններուն մէջ։
Ի պատասխան՝ Պաքուի ԱԳՆ-էն նշած են, որ յարաբերութիւնները չեն կրնար միակողմանի ըլլալ, ուստի նոյն մօտեցումը պիտի կիրառէ Պաքուն։
Յայտարարութեան մէջ նաեւ կը նշուի, որ ԱՄՆ-ի միակողմանի մօտեցումը կրնայ յանգեցնել անոր, որ ԱՄՆ կորցնէ իր միջնորդական դերը։
«Կարեւոր է նշել, որ այս պայմաններուն մէջ մենք հնարաւոր չենք համարեր 2023 թուականի Նոյեմբեր 20-ին Ուաշինկթընի մէջ Ատրպէյճանի եւ Հայաստանի արտաքին գործերու նախարարներու մակարդակով հանդիպում անցընելը», նշուած է յայտարարութեան մէջ: