Իշխանութիւններուն հեռացումը պահանջող ընդդիմութիւնը հանրահաւաք կատարեց Հանրապետութեան հրապարակին վրայ: Այն նախատեսուած էր քանի մը օր առաջ, սակայն յետաձգեցին՝ պատճառաբանելով, որ կը լծուին արցախցիներուն օգնելու գործին:
Շաբաթ օրուան հաւաքին մէկ մասը նուիրուած էր Արցախէն տեղափոխուածներուն օգնելու կարեւորութեան: Հարթակէն խօսցաւ նաեւ Արցախի թեմի առաջնորդը:
Հանրահաւաքը եզրափակեց Ազգային Կոմիտէի անդամ Վազգէն Մանուկեանը: Վերջինս անցեալ շաբաթ յայտարարած էր, որ երեք օր շարունակ պէտք է քաղաքը անդամալուծեն, անհնազանդութեան շարժումներ կատարեն, բայց այդ օր խոստովանեցաւ, որ իրենք, ըստ էութեան, իրենց ուժերը գերագնահատած են ու այդ չյաջողեցաւ:
«Չյաջողեցաւ, մենք սխալուեցինք, սխալն այն էր, որ մենք գերագնահատեցինք մեր մարդկային եւ կազմակերպական ուժը: Բայց մի շատ դրական բան էր կատարւում, որովեհտեւ տարբեր համալսարանների ուսանողներ առանց մեր դրդման, միայն խօսքով, վրդովուած այն ամէնով ինչ լինում էր, դուրս էին գալիս», նշեց Վազգէն Մանուկեանը:
Ան յայտնեց, որ այս օրերուն դիմած են տարբեր քաղաքական ուժերու իրենց միանալու համար եւ դրական պատասխան չեն ստացած: Թէ որ ուժերուն մասին է խօսքը, Մանուկեան անուններ չհրապարակեց:
Աւելի վաղ ելոյթ ունեցավ Ազգային Կոմիտէի անդամ, «Հայաքուէ» նախաձեռնութեան համակարգող Աւետիք Չալապեանը: Խօսելով արցախցիներուն մասին, ան ընդգծեց՝ պէտք է ամէն ինչ ընեն, որ տասնեակ հազարաւոր քաղաքացիները համարկուելու խնդիր չունենան:
«Մեր համար շատ կարեւոր է, որպէսզի մեր քոյրերն ու եղբայրները, որոնք գալիս են այստեղ, այստեղ նաեւ հայրենիք գտնեն, մեր մէջ գտնեն աջակցութիւն, էն հասարակութիւնը, որում իրանք պատրաստ են ապրել: Այդ դէպքում իրանք կը մնան այստեղ, կը կանգնեն մեր կողքը, կը բազմապատկեն մեր ուժը, կ’օգնեն փոխել իշխանութիւնը», յայտարարեց Չալապեանը:
