ԱՄՆ պետական քարտուղար Էնթընի Պլինքընը Ատրպէյճանի նախագահ Իլհամ Ալիեւի հետ հեռախօսազրոյցին ընթացքին ընդգծած է Լաչինի միջանցքի բացման կարեւորութիւնը առեւտրային եւ մասնաւոր փոխադրութեան միջոցներու համար: Այս մասին կը հաղորդուի Պետական Քարտուղարութեան կայքին մէջ:
«Պետական քարտուղարը յայտնած է ԱՄՆ-ի խոր մտահոգութիւնը` կապուած Ատրպէյճանի կողմէ Լաչինի միջանցքին հսկիչ-անցագրային կէտ տեղադրելու հետ: Ան նշած է, որ այդ կը խաթարէ խաղաղութեան գործընթացին վստահութիւն հաստատելու ջանքերը», կ’ըսուի գերատեսչութեան հաղորդագրութեան մէջ:
Պլինքըն ընդգծած է Ատրպէյճանի եւ Հայաստանի միջեւ խաղաղութեան բանակցութիւններուն կարեւորութիւնը եւ խոստացած է ԱՄՆ-ի աջակցութիւնը:
