Վարչապետ Նիկոլ Փաշինեան հեռախօսազրոյց ունեցած է ԱՄՆ պետական քարտուղար Էնթընի Պլինքընի հետ:
Զրուցակիցները անդրադարձած են տարածաշրջանին մէջ հաստատուած ռազմաքաղաքական եւ մարդասիրական իրադրութեան:
Վարչապետ Փաշինեան ընդգծած է, որ Լաչինի միջանցքին ատրպէյճանական կողմին քայլերը միտուած են Լեռնային Ղարաբաղի մէջ ցեղային զտումներ իրականացնելու եւ Լեռնային Ղարաբաղը ամբողջութեամբ հայաթափելու իր քաղաքականութեան հետեւողական իրագործման: Վարչապետը շեշտած է Ատրպէյճանի կողմէ տարածաշրջանային անվտանգութիւնը խարխլող գործողութիւններուն միջազգային հանրութեան համարժէք արձագանգի կարեւորութիւնը եւ գործուն քայլերու ձեռնարկումը` Արդարադատութեան Միջազգային Դատարանի վճիռի անվերապահ կատարման ուղղութեամբ:
Միտքեր փոխանակուած են նաեւ Հայաստան-Ատրպէյճան բանակցային գործընթացին, այդ շարքին` Ուաշինկթընի մէջ օրերս կայանալիք քննարկումներուն շուրջ:
Կողմերը կարեւորած են տարածաշրջանին մէջ կայունութեան ու խաղաղութեան ապահովման ուղղութեամբ հետեւողական ջանքերը:
Անդրադարձ կատարուած է մարդասիրական բնոյթի այլ հարցերու: