Արցախի Անվտանգութեան Խորհուրդի նախկին քարտուղար Սամուէլ Բաբայեանի մամուլի ծառայութիւնը յայտարարութեամբ հանդէս եկած է։
«Վերջին շրջանում մամուլում եւ սոցիալական մետիայում շրջանառւում են Սամուէլ Բաբայեանի կողմից, իբր թէ, արցախցիներին հաւաքագրելու եւ նրանց Արցախ վերադարձնելու վերաբերեալ տեղեկութիւններ։
«Հաշուի առնելով խնդրի զգայունութիւնն ու հասարակական-քաղաքական շրջանակների կողմից այն կապիտալիզացնելու մեծ գայթակղութիւնը՝ յայտարարում ենք, որ Սամուէլ Բաբայեանն անհատապէս կամ համագործակցաբար չի զբաղւում նմանաբնոյթ աշխատանքներով։
«Փոխարէնը նա Արցախի Հանրապետութեան ներկայացուցչական մարմնի եւ կառավարութեան քննարկմանն է ներկայացրել Լեռնային Ղարաբաղի կարգավիճակի եւ հայ բնակչութեան վերադարձի շուրջ համապարփակ մօտեցումներ։ Այդ մօտեցումներով առաջարկուել է ձեւաւորել համապատասխան աշխատանքային խումբ, վերջինիս օժտել Լեռնային Ղարաբաղի կարգավիճակի եւ հայ բնակչութեան վերադարձի շուրջ ատրպէյճանական կողմի հետ ուղիղ բանակցութիւններ վարելու իրաւասութեամբ։
«Բացի այս, Սամուէլ Բաբայեանն իր հանրային խօսքում մշտապէս շեշտում է, որ բնակչութեան վերադարձի հնարաւորութեան քննարկումն, առանց Լեռնային Ղարաբաղի կարգավիճակի յստակացման, արկածախնդրութիւն է։
«Սամուէլ Բաբայեանը եւս տեղեկութիւններ ունի արցախցիների ցուցակագրմամբ զբաղուող խմբակների առեւտրային գործունէութեան վերաբերեալ։ Այս կապակցութեամբ կոչ է անում իրաւապահ մարմիններին համապատասխան աշխատանքներ տանել այդ ուղղութեամբ, իսկ արցախցի հայրենակիցներին յորդորում է չհաւատալ ինքնակոչ փրկիչների ստայօդ խոստումներին եւ չնպաստել նրանց առեւտրային գործունէութեանը», կ’ըսուի յայտարարութեան մէջ։
