Ատրպէյճանը Միացեալ Նահանգներու եւ այլ գործընկերներու հետ բարձր մակարդակի շփումներու ընթացքին համաձայնած է Լաչինի միջանցքի եւ Աղտամ-Ստեփանակերտ ճանապարհի միաժամանակեայ օգտագործման Կարմիր Խաչի Միջազգային Կոմիտէի միջնորդութեամբ։
Ատրպէյճանի ԱԳՆ-ն յայտարարած է, որ ատրպէյճանական կողմը պատրաստ է Աղտամ-Ստեփանակերտ ճանապարհին զուգահեռ Լաչինի միջանցքով ԿԽՄԿ-ի միջնորդութեամբ բեռներու փոխադրման համար պայմաններ ստեղծել անցակէտին սահմանային եւ մաքսային ընթացակարգերու պահպանմամբ։
«Մենք եւս մէկ անգամ կը յայտարարենք, որ ատրպէյճանական կողմը պատրաստ է ԿԽՄԿ-ի միջնորդութեամբ Աղտամ-Խանքենդի ճանապարհին զուգահեռ բեռներու փոխադրման համար պայմաններ ստեղծել՝ Լաչինի սահմանային անցակէտին սահմանային եւ մաքսային ընթացակարգերու պահպանմամբ», այս մասին յայտնած է ԱԳՆ մամուլի քարտուղար Այխան Հաճիզատէն։