Ռուսական խաղաղապահ զօրակազմի հրամանատարին Պաքու այցը արդիւնքներ չէ տուած: Արցախի պետական նախարար Գուրգէն Ներսիսեան յայտնած է, որ անցեալ շաբաթ Պաքու մեկնած Ալեքսանտր Լենցովը չէ յաջողած ատրպէյճանական կողմին հետ պայմանաւորուածութեան հասնիլ:
«Քննարկումների արդիւնքներով իրավիճակի դրական փոփոխութեան եւ 2020թ. Նոյեմբերի 9-ի եռակողմ յայտարարութեամբ նախատեսուած պայմանների վերականգնման շուրջ պայմանաւորուածութեան հասնել չի յաջողուել», գրած է պետական նախարարը:
Ըստ Գուրգէն Ներսիսեանի` ամենակարճ ժամկէտի մէջ կը նախատեսուի նոր հանդիպում: Թէ ո՞ւր, ի՞նչ ձեւաչափով, բարձրաստիճան պաշտօնեան չէ մանրամասնած:
Խաղաղապահներու հրամանատարը Պաքուի մէջ հանդիպած էր Ատրպէյճանի պաշտպանութեան նախարար Զաքիր Հասանովի հետ: Ատրպէյճանի պաշտպանական գերատեսչութիւնը յայտնած էր, թէ հանդիպման ընթացքին քննարկուած է «ղարաբաղեան տնտեսական շրջանին մէջ ռուս խաղաղապահներու ժամանակաւոր տեղակայման գօտիին մէջ առկայ իրավիճակը»: Այլ մանրամասնութիւններ չէր հաղորդուած հանդիպումէն: Թէ արդեօք այլ հանդիպումներ ունեցա՞ծ է ռուս բարձրաստիճան զինուորականը, եւս չէ հաղորդուած:
