Հայաստանի արտաքին գործերու նախարար Արարատ Միրզոյեան ընդունած է Հայաստանի մէջ ԱՄՆ նորանշանակ դեսպան Քրիսթինա Քվինը: Հանդիպման ընթացքին, ըստ Արտաքին քաղաքական գերատեսչութեան հաղորդագրութեան, ընդգծուած է Հայաստան-ԱՄՆ ռազմավարական երկխօսութեան ձեւաչափի կարեւորութիւնը:
Արարատ Միրզոյեան եւ Քրիսթինա Քվինը քննարկած են նաեւ տարածաշրջանային անվտանգութեան ու կայունութեան առնչուող հարցեր: Անդրադարձած են Հայաստան-Ատրպէյճան յարաբերութիւններու կարգաւորման գործընթացի վերջին զարգացումներուն, այդ շարքին` Միւնիխի մէջ տեղի ունեցած եռակողմ հանդիպման:
«Հայկական կողմը բարձր է գնահատել ԱՄՆ ներդրած ջանքերը` ինչպէս երկկողմ ձեւաչափում, այնպէս էլ որպէս ԵԱՀԿ Մինսքի Խումբի համանախագահող երկրի, տարածաշրջանում երկարատեւ խաղաղութեան հաստատման գործում», ըսուած է հաղորդագրութեան մէջ:
Անդրադառնալով Ատրպէյճանի կողմէ Լեռնային Ղարաբաղի ապօրինի շրջափակման` Արարատ Միրզոյեան շեշտած է, որ ատրպէյճանական կողմը առանց որեւէ նախապայմաններու պէտք է վերականգնէ Լաչինի միջանցքի` Նոյեմբեր 9-ի եռակողմ յայտարարութեամբ սահմանուած կարգը:
Արտաքին գործերու նախարարը արժեւորած է ԱՄՆ աջակցութիւնը` ուղղուած Հայաստանի մէջ հաստատութենական կարողութիւններու ամրապնդման եւ կառավարութեան ժողովրդավարական բարեփոխումներու խթանման:
ԱՄՆ նորանշանակ դեսպանը իր հաւատարմագրերու պատճէնը յանձնած է ՀՀ արտաքին գործերու նախարարին: