Հայաստանի մէջ տնտեսական աշխուժութեան ցուցանիշը 2024 թուականի Յունուար-Մարտ ամիսներուն 14,3 տոկոսով բարձր եղած է նախորդ տարուայ նոյն ժամանակահատուածի տուեալէն: Այդ մասին նշուած է ՀՀ Վիճակագրական Կոմիտէի ներկայացուցած՝ երկրի ընկերա-տնտեսական վիճակը բնութագրող մաքրոտնտեսական ցուցանիշերու հերթական ամփոփագրին մէջ:
Ընդ որում, այս տարուայ Մարտին նշուած ցուցանիշը Փետրուարի համեմատ աճած է 10,4, իսկ 2023-ի Մարտ ամսուան համեմատ՝ 15,3 տոկոսով:
Այս տարուայ առաջին եռամսեակին Հայաստանի արտաքին առեւտրաշրջանառութիւնը նախորդ տարուայ նոյն ժամանակահատուածին համեմատ աճած է 2,1 անգամ՝ կազմելով 9 միլիառ 169,7 միլիոն տոլար:
Փետրուարի համեմատ Մարտին առեւտրաշրջանառութիւնը աճած է 7,3 տոկոսով: 2024-ի Մարտին, նախորդ տարուայ նոյն ամսուայ համեմատ, աւելցած է 2,1 անգամ՝ կազմելով 3 միլիառ 568,2 միլիոն տոլար:
Տարուայ առաջին եռամսեակին Հայաստանէն արտահանումը 2,7 անգամ գերազանցած է նախորդ տարուայ նոյն ժամանակահատուածի ցուցանիշը՝ կազմելով 4 միլիառ 422,8 միլիոն տոլար: Այս տարուայ Մարտին, Փետրուարի համեմատ, աճը կազմած է 13,1 տոկոս, իսկ 2023-ի Մարտի համեմատ աւելցած է 3 անգամ՝ կազմելով 1 միլիառ 845,4 միլիոն տոլար:
2023 թուականին Հայաստանի մէջ բնակչութեան մէկ շունչի հաշուարկով համախառն ներքին արդիւնքը կազմած է 8170 ԱՄՆ տոլար: 2022 թուականին ՀՆԱ-ն՝ մէկ շունչի հաշուով կազմած է 6661 տոլար:
