Երեւանի Ընդհանուր իրաւասութեան դատարանը, դատաւոր Մեսրոպ Մակեանի նախագահութեամբ, հրապարակած է Նորքի զինուած խումբի քրէական գործով դատավճիռը: Դատարանը Արթուր Վարդանեանը մեղաւոր ճանչցաւ առաջադրուած մեղադրանքներուն մէջ եւ անոր նկատմամբ պատիժ նշանակեց 13 տարի ժամկէտով բանտարկութիւն, Անթոն Թոթոնճեանին` 9 տարի ժամկէտով, սակայն կիրառեց փորձաշրջան:
ՀՀ պաշտպանութեան նախկին նախարարի տեղակալ Վահան Շիրխանեանը արդարացուեցաւ Արթուր Վարդանեանի կողմէ ստեղծուած յանցաւոր համագործակցութեան մասնակցելու եւ ապօրինի կերպով զէնք-զինամթերք ձեռք բերելու, կրելու յօդուածներով` յանցակազմի բացակայութեան հիմքով: Շիրխանեան մեղաւոր ճանչցուեցաւ իշխանութիւնը իւրացնելուն նախապատրաստութեան օժանդակելու համար: Անոր նկատմամբ պատիժ նշանակուեցաւ 6 տարի ժամկէտով բանտարկութիւն, սակայն ան համաներման կիրառմամբ նշանակուած պատիժէն ազատեցաւ:
Նորք-Մարաշի զինուած խումբի գործի շրջանակին մեղադրանք առաջադրուած է աւելի քան երեք տասնեակ մարդու: Ըստ մեղադրանքին` Արթուր Վարդանեանի գլխաւորած զինուած խումբը ծրագրած էր բռնութեամբ զաւթել իշխանութիւնը: Օրինակ` թռիչքի պահուն խոցել նախագահին օդանաւը, յարձակում գործել ՀՀ նախագահի նստավայրի, Ազգային Ժողովի, Սահմանադրական դատարանի, Կառավարութեան, Հանրային հեռուստաընկերութեան եւ այլ հաստատութիւններու շէնքերուն վրայ:
Անոնց մեղադրանքներ առաջադրուած են յանցաւոր համագործակցութիւն ստեղծելու եւ ղեկավարելու (Քրէական օրէնսգիրքի 223-րդ յօդուածի 1-ին մաս), յանցաւոր համագործակցութեան մասնակցելու (Քրէական օրէնսգիրքի 223-րդ յօդուածի 2-րդ մաս) եւ կազմակերպուած խումբին կողմէ ապօրինի կերպով հրազէն, ռազմամթերք, պայթուցիկ նիւթեր ձեռք բերելու, իրացնելու, պահելու, փոխադրելու եւ կրելու (Քրէական օրէնսգիրքի 235-րդ յօդուածի 3-րդ մաս) համար:
