ՀԱՊԿ առաքելութեան խումբը հայ-ատրպէյճանական սահմանին լարուածութեան թուլացման առաջարկներ մշակած է: Այս մասին յայտնած են ՀԱՊԿ Միացեալ շտաբի մամուլի ծառայութենէն:
«ՀՀ Պաշտպանութեան Նախարարութեան մէջ տեղի ունեցած է խորհրդակցութիւն` նուիրուած Հայաստանի մէջ ՀԱՊԿ առաքելութեան առաջապահ խումբի աշխատանքի արդիւնքներուն: Զօրավար-գնդապետ Անաթոլի Սիտորովը, որ կը ղեկավարէ առաջնային խումբը, ՀՀ պաշտպանութեան նախարար Սուրէն Պապիկեանին տեղեկացուցած է Հայաստանի եւ Ատրպէյճանի սահմանի առանձին հատուածներուն մէջ ստեղծուած իրավիճակի վերլուծութեան հետեւանքներուն, հիմնական եզրակացութիւններու եւ համապատասխան միջոցառումներու առաջարկներու մասին», ըսած են մամուլի ծառայութենէն:
«Տեղի ունեցած է միտքերու անկեղծ եւ կառուցողական փոխանակում: Մշակուած առաջարկները ուղղուած են լարուածութեան թուլացման», նշուած է հաղորդագրութեան մէջ:
Պաշտպանութեան Նախարարութեան մէջ կայացած հանդիպումէն յետոյ ՀԱՊԿ առաքելութեան խումբը մեկնած է Մոսկուա:
