Ռուսաստանի համար կարեւոր եւ գնահատելի է, որ յեղափոխութենէն ու իշխանափոխութենէն ետք Հայաստան իր արտաքին քաղաքական արեւելումը եւ ուղղութիւնը չէ փոխած «Արմէնբրես»-ի հաղորդմամբ՝ Հայաստանի մէջ Երեւան-Մոսկուա տեսակամուրջին նման տեսակէտ յայտնած է պատմական գիտութիւններու դոկտոր, Ռուսաստանի գիտութիւններու ակադեմիայի (ՌԳԱ) համաշխարհային տնտեսութեան եւ միջազգային յարաբերութիւններու հիմնարկի գլխաւոր գիտաշխատող, կովկասագէտներու գիտական միութեան նախագահ Ալեքսանդր Քռիլովը:
«Հայաստանի ներկայիս իշխանութիւնները, երբ եկան իշխանութեան, փոխեցին իրենց՝ արտաքին քաղաքական ուղղութիւնը փոխելու մասին նախկին տեսակէտը: Այդ առարկայական է, քանի որ եթէ ելլենք Հայաստանի ազգային հետաքրքրութիւններէն, ապա կարելի չէ քաղաքական ուղղութիւնը տանիլ դէպի Ռուսաստանի հետ յարաբերութիւններու խզման»,-ըսած է Քռիլով:
Անոր կարծիքով՝ Հայաստանն ու Ռուսաստանը հիմա կ՛անցնին նոր յարաբերութիւններու ձեւաւորման փուլ, քանի որ եկած են նոր ուժեր, փոխուած է առաջնորդներու սերունդը: Անոր խօսքով՝ հիմա չկայ, այսպէս ըսած, երկու իշխանութիւն: «Կայ խորհրդարան, որ կ՛աջակցի վարչապետին, եւ բարեփոխումներու ճանապարհ բացուած է: Թէ ինչպէս պիտի կազմակերպուին Ռուսաստանի հետ յարաբերութիւնները, արդէն յայտարարուած է, արտաքին քաղաքականութեան մօտեցումը պիտի չփոխուի: Այդ մէկը շատ կարեւոր եւ գնահատելի է Ռուսաստանի համար»,-ըսած է Քռիլովը:
Ան նաեւ կարեւորած է, որ Հայաստանի մէջ փոխակերպումները յաջող ընթանան: