Հայաստանը կը դառնայ միակ երկիրը, որ, չունենալով ԵՄ թեկնածուի կարգավիճակ կամ ԵՄ-ի հետ կնքուած «խոր եւ համապարփակ ազատ առեւտուրի» համաձայնագիր, տնտեսական արտօնութիւն կը ստանայ։ Այս մասին յայտնած է արտաքին գործերու եւ միջազգային առեւտուրի նախարարի մամուլի խօսնակ Անի Բադալեան։
Հայկական ապրանքներու նկատմամբ առեւտրային ինքնավար միջոցներու կիրառման մասին ԵՄ կարգաւորման առաջարկը վերջնական հաւանութեան արժանացած է ԵՄ խորհուրդի՝ մրցակցութեան հարցերով խորհուրդին կողմէ։
Եւրոպական խորհրդարանի եւ ԵՄ խորհուրդի նախագահներուն կողմէ ստորագրուելէ յետոյ կարգաւորումը պիտի հրապարակուի ԵՄ պաշտօնական տեղեկագրին մէջ եւ անոր յաջորդող օրը պիտի մտնէ ուժի մէջ։
«ԵՄ այս կարգաւորմամբ կ’ազատականացնեն դէպի ԵՄ տարածք Հայաստանի արտահանումների շուրջ 80%-ը՝ կասեցնելով ներմուծման մաքսատուրքերն ապրանքների լայն շրջանակի, այդ թւում՝ որոշ գիւղատնտեսական ապրանքների նկատմամբ։ Յիշեալ միջոցները կը նպաստեն Հայաստանի արտաքին առեւտրի բազմազանեցմանը, հայկական ապրանքների համար ԵՄ շուկայի հասանելիութեան ընդլայնմանը եւ ՀՀ-ԵՄ տնտեսական ու առեւտրային համագործակցութեան հետագայ խորացմանը։ Ուժի մէջ մտնելուց յետոյ արտօնեալ կարգը գործելու է 2 տարի ժամկէտով»,- յայտնած է Բադալեան:
Սեպտեմբեր 2-ին ԵՄ խորհուրդը տուած էր իր համաձայնութիւնը նախագիծին՝ առանց փոփոխութիւններու։ Այնուհետեւ՝ Սեպտեմբեր 15-ին, լիագումար նիստին, իր հերթին փաստաթուղթին հաւանութիւն տուած էր Եւրոպական խորհրդարանը։ Սեպտեմբեր 23-ին նախագիծը ընդունուած էր նաեւ ԵՄ խորհուրդի` անդամ երկիրներու մշտական ներկայացուցիչներու կոմիտէին մէջ:
«Յիշեալ կարգաւորման ընդունմամբ Հայաստանը դառնում է միակ երկիրը, որը չունենալով ԵՄ թեկնածուի կարգավիճակ կամ ԵՄ հետ կնքուած «խոր եւ համապարփակ ազատ առեւտրի» համաձայնագիր, ստանում է նման տնտեսական արտօնութիւն, ինչը եւս մէկ անգամ վկայում է ՀՀ-ԵՄ գործընկերութեան աննախադէպ բարձր մակարդակի մասին եւ համահունչ է ՀՀ-ԵՄ առաջին գագաթնաժողովի հռչակագրի ոգուն եւ գործընկերութեան ռազմավարական օրակարգին»,- ըսուած է Բադալեանի յայտարարութեան մէջ:
