Ռուսաստանի Դաշնութիւնը Հայաստանին առաջարկած է կառուցել մէկ կամ երկու պլոքով աթոմակաեան:
«Վեստի» լրատուական գործակալութեան այս մասին յայտնած է «Ռոսատոմ» ընկերութեան գլխաւոր տնօրէն Ալեքսէյ Լիխաչովը։
Ան ընդգծած է, որ այսօր Հայաստանին մէջ ելեկտրուժի 30 տոկոսը աթոմային է, սակայն պահանջարկը կ’աճի, եւ ատիկա կրնայ յառաջիկայ տասնամեակներու ընթացքին յանգեցնել ելեկտրական հզօրութիւններու պակասի:
«Անոր պէտք է պատրաստ ըլլալ։ Եւ մեր պատասխանն է ունենալ մեծ կամ միջին հզօրութեան կայան, մէկ կամ երկու պլոք, որ պիտի բաւարարէ ուժանիւթի յառաջիկայ պակասը տասնամեակներ շարունակ: Եւ, ի հարկէ, մենք խորապէս համոզուած ենք, որ ինքնին միջուկային ուժանիւթի մասնագիտական ներուժի առկայութիւնը որակեալ տնտեսութեան եւ արդիւնաբերութեան նշան է»,- նշած է Լիխաչով:
Ան յիշեցուցած է, որ հայկական աթոմային ելեկտրակայանի վերագործարկման հերթական փուլէն յետոյ կարելի եղած է կայանին հզօրութիւնները բարձրացնել մօտ 10 տոկոսով:
Յիշեցնենք, որ այս պահուն կ’ընթանան հայկական աթոմակայանի շահագործման ժամկէտը եւս 10 տարիով երկարաձգելու աշխատանքները, որմէ յետոյ Հայաստանը կը ծրագրէ նոր աթոմակայան կառուցել։ Հայաստանի կառավարութիւնը որոշած է, որ նոր աթոմակայանը պէտք է ըլլայ մոտուլային, իսկ նման աթոմակայանի կառուցման շուրջ Երեւանը բանակցութիւններ կը վարէ 5 երկիրներու՝ Ֆրանսայի, ԱՄՆ-ի, Ռուսաստանի, Չինաստանի, Հարաւային Քորէայի հետ։
