Դանիոյ նախկին վարչապետ եւ Հիւսիսատլանտեան դաշինքի նախկին գլխաւոր քարտուղար Անտերս Ֆոկ Ռասմուսեն համոզուած է, որ Հայաստանը ժողովրդավարութիւն է անհաւանական բարդ աշխարհաքաղաքական հարեւանութեամբ, եւ վարչապետ Նիկոլ Փաշինեանի կառավարութիւնը համարձակ որոշում կայացուցած է՝ փորձելով բազմազանեցնել ՀՀ արտաքին քաղաքականութիւնը եւ շարժիլ դէպի Արեւմուտք։
Այս մասին Ռասմուսէն ըսած է իր կողմէ ղեկավարած «Հայաստանի բարեկամներ ցանց» բարձր մակարդակի խումբի զեկոյցի հրապարակումէն յետոյ։
«Աշխարհի ժողովրդավարական երկիրները եւ յատկապէս Եւրոմիութիւնը պէտք է գործեն՝ աջակցելու Հայաստանին այս առանցքին մէջ», ընդգծած է ան։
Անդրադառնալով Լեռնային Ղարաբաղի մէջ տեղի ունեցած իրադարձութիւններուն՝ ան նշած է․
«Այս աջակցութիւնը աւելի կարեւոր դարձած է 2023 թուականին Լեռնային Ղարաբաղի հայ բնակչութեան դէմ Ատրպէյճանի յարձակումէն եւ ատրպէյճանական ուժերուն կողմէ բխող շարունակական սպառնալիքէն յետոյ։
Ռուսաստանի անօրինական ներխուժումը Ուքրանիա ցոյց տուաւ, որ Եւրոմիութիւնը պէտք է շատ աւելին ընէ իր անմիջական հարեւանութեամբ գտնուող ժողովրդավարութիւնները պաշտպանելու համար», ըսած է ՆԱԹՕ-ի նախկին գլխաւոր քարտուղարը:
Ռասմուսեն համոզմունք յայտնած է, որ Եւրոպան հնարաւորութիւն ունի աջակցելու Հարաւային Կովկասի մէջ կայուն ժողովրդավարութեան եւ կայուն խաղաղութեան։«Այսօրուայ զեկոյցը կ’ուրուագծէ այն շօշափելի քայլերը, որոնք կրնան եւ պէտք է ձեռնարկուին՝ ի վերջոյ յանգեցնելով Հայաստանի անդամակցութեան Եւրաոմիութեան», եզրափակած է Ռասմուսեն։
