Արցախի Հանրապետութեան նախագահ Սամուէլ Շահրամանեանը Դեկտեմբեր 22-ին հանդիպած է այն պետական մարմիններու ղեկավարներուն հետ, որոնք կը շարունակեն պաշտօնավարել հասարակական հիմունքներով, յայտնած են Արցախի տեղեկատուական շտաբէն:
Քննարկուած է բռնի տեղահանումէն յետոյ արցախցիներու հիմնախնդիրները, անոնց լուծման ուղղութեամբ առանձնացուած են առաջարկութիւններ:
Ներկայացնելով կատարուած ու կատարուող աշխատանքները՝ նախագահ Շահրամանեան ընդգծած է 2024 թուականին զանոնք շարունակելու անհրաժեշտութիւնը, Ստեփանակերտի քաղաքապետին եւ շրջվարչակազմերու ղեկավարներուն յանձնարարած է շարունակել գոյքագրել բռնի տեղահանուած քաղաքացիներուն խնդիրներն ու պարբերաբար ներկայացնել կառավարութեան:
Անդրադառնալով վերջին շրջանին լայն քննարկում ստացած նախագահին՝ Սեպտեմբեր 26-ի հրամանագրին՝ Սամուէլ Շահրամանեան ընդգծած է, որ Արցախի Հանրապետութեան իրաւական դաշտին մէջ գոյութիւն չունի փաստաթուղթ, որով կը նախատեսուի լուծարել պետական հիմնարկները, յայտնած են Արցախի տեղեկատուական շտաբէն:
ՀՀ վարչապետի աշխատակազմի ղեկավարի տեղակալ Տարօն Չախոյեանը, անդրադառնալով Շահրամանեանի այս յայտարարութեան, նկատած է՝ Լեռնային Ղարաբաղը լուծարեցին, զէնքերը յանձնեցին, ժողովուրդը տեղահանեցին, հիմա Երեւանին մէջ «փրկիչ» կը խաղան։
Ըստ Չախոյեանի՝ ԼՂ իրաւական դաշտին մէջ գոյութիւն չունէր նաեւ փաստաթուղթ, որով կը նախատեսուէր զէնքերը յանձնել։
«Եթէ ոմանք գտնում են, որ ԼՂ պետական հիմնարկները պէտք է շարունակեն գործել Հայաստանում, ապա պէտք է հաշուի առնեն, որ այդ պետական հիմնարկները պէտք է լուծեն ԼՂ հայերի ընկերային, կրթական, առողջական, կենցաղային ու կեցավայրի խնդիրները, այդ թւում՝ նաեւ ԼՂ հայերի՝ դրամատներից վերցրած վարկերի հարցը։ Կարո՞ղ են լուծել, ի հարկէ՝ ոչ։ Ցանկութեան դէպքում կարող են սկսել վարկերի մարումից», ընդգծած է կառավարութեան անդամը:
Իսկ եթէ ոմանք, ըստ Չախոյեանի, պարապութենէն կը փափաքին պետական պաշտօնեայի կարգավիճակով ապրիլ Հայաստանի մէջ ու ՀՀ քաղաքացիներու հաշուոյն աշխատավարձ ստանալ, այդ պիտի չըլլայ. «Քանի որ ԼՂ-ն լուծարելուց յետոյ դրա պետական հիմնարկների գոյութիւնը Հայաստանում անհնարին է՝ պետութեան մէջ պետութիւն չի կարող լինել, առաւել եւս, որ դա անվտանգային սպառնալիքներ է ստեղծում Հայաստանի համար»:
