Նիւ Եորքի մէջ, ՄԱԿ-ի Անվտանգութեան Խորհրդին մէջ տեղի ունեցաւ Լեռնային Ղարաբաղի հարցով քննարկում:
Ելոյթներով հանդէս եկան Ֆրանսայի, Բրիտանիոյ, Չինաստանի, Պրազիլիոյ, Էքուատորի, Ալպանիոյ, Ռուսաստանի, Թուրքիոյ եւ շարք մը այլ երկիրներու ներկայացուցիչները, ինչպէս նաեւ Եւրոմիութեան բարձր ներկայացուցիչը:
Գրեթէ բոլոր բանախօսները դատապարտեցին Լեռնային Ղարաբաղի վրայ Ատրպէյճանի վերջին յարձակումը եւ կոչ ըրին բանալու Լաչինի միջանցքը:
Անոնք ի գիտութիւն ընդունեցին զինադադարի մասին հաղորդագրութիւնը եւ ընդհանուր առմամբ ողջունեցին Եվլախի մէջ Ատրպէյճանի պաշտօնեաներուն եւ Լեռնային Ղարաբաղի հայութեան ներկայացուցիչներու առաջին հանդիպման փաստը:
Բոլոր բանախօսները ընդգծեցին Ատրպէյճանի եւ Հայաստանի տարածքային ամբողջականութիւնը ճանչնալու եւ Լեռնային Ղարաբաղի բնակիչներուն իրաւունքները՝ ներառեալ իրենց հայրենիքին մէջ ապրելու իրաւունքը պաշտպանելու անհրաժեշտութիւնը:
Ռուսաստանի ներկայացուցիչ, ՄԱԿ-ի մէջ փոխդեսպան Տմիթրի Փոլիանսքին պատմեց ռուս խաղաղապահներու ծառայութեան մասին, նշելով որ անոնց շարքերուն մէջ կան զոհեր, իսկ խօսելով հարցի քաղաքական կողմին մասին, յիշեցուց, որ Հայաստանը ճանչցած է Լեռնային Ղարաբաղը Ատրպէյճանի կազմին մէջ:
Հայաստանի արտաքին գործերու նախարար Արարատ Միրզոյեան իր ուղերձին մէջ նշեց, որ Ատրպէյճանի նպատակը Լեռնային Ղարաբաղի մէջ ցեղային զտում իրականացնելն է: Ան ներկայացուց Լեռնային Ղարաբաղի բնակիչներուն՝ կանանց եւ տղամարդոց, տարեցներու, կանանց եւ երեխաներու ծանրագոյն կացութիւնը:
Անոր փոխանցմամբ, ՄԱԿ-ի Անվտանգութեան Խորհուրդը եւ միջազգային համայնքը ժամանակին միջոցներ չեն ձեռնարկած Լեռնային Ղարաբաղի հայութեան սպառնացող ողբերգութիւնը կանխելու համար, թէպէտ Հայաստանը բազմիցս ահազանգած է այդ մասին: Միրզոյեան ընդգծեց, որ Հայաստանը Լեռնային Ղարաբաղի մէջ ստորաբաժանումներ չէ ունեցած:
Ատրպէյճանի արտաքին գործերու նախարար Ճէյհուն Պայրամով հերքեց հայ պաշտօնակիցին եւ միւս բանախօսներուն կողմէ Ատրպէյճանի հասցէին հնչեցուած մեղադրանքները եւ պնդեց, որ Հայաստանը կը խոչընդոտէ խաղաղութեան գործընթացը:
Ան նաեւ յիշեցուց, որ ռուսական կողմին միջնորդութեամբ ձեռք բերուած զինադադարի մասին յայտարարութեան մէջ կը նշուի «Ատրպէյճանէն հայկական ստորաբաժանումները դուրս բերելու» դրոյթը, ինչ որ, ըստ Պայրամովի, կ’ապացուցէ, որ «Ղարաբաղի մէջ 44-օրեայ պատերազմէն յետոյ մնացած են հայ զինուորներ»:
Թուրքիոյ արտաքին գործերու փոխնախարար Պուրաք Աքչափարը անվերապահօրէն սատարեց Պայրամովին, խօսեցաւ «Զանգեզուրի միջանցք»ը բանալու անհրաժեշտութեան մասին, ըսաւ որ Ատրպէյճանը պարտադրուած էր «հակահաբեկչական գործողութիւն» կատարել, եւ աւելցուց, որ հիմա վերստին ստեղծուած է խաղաղութիւն հաստատելու հնարաւորութիւն, որ Հայաստանը պէտք չէ բաց թողէ:
ԵՄ բարձր ներկայացուցիչ Ժոզեփ Պորել իր համերաշխութիւնը յայտնեց արցախահայերուն, Ատրպէյճանին կոչ ըրաւ բանալու Լաչինի միջանցքը, յարգելու արցախահայութեան իրաւունքները: Ան ըսաւ, որ անհրաժեշտ է վերականգնել հայ-ատրպէյճանական բանակցային գործընթացը:
ՄԱԿ-ի Անվտանգութեան Խորհուրդի նիստի աւարտին որեւէ յայտարարութիւն կամ բանաձեւ չընդունուեցաւ:
