Վարչապետ Նիկոլ Փաշինեանի գլխաւորութեամբ տեղի ունեցած է կառավարութեան հերթական նիստը: Նիստին սկիզբը վարչապետը անդրադարձած է Ատրպէյճանի կողմէ ապօրինի կերպով Լաչինի միջանցքի արգելափակման հետեւանքով Լեռնային Ղարաբաղի մէջ ստեղծուած մարդասիրական ճգնաժամին, Կոռնիձորի մէջ գտնուող մարդասիրական օգնութեան Լեռնային Ղարաբաղ տեղափոխելու արգելափակման, ինչպէս նաեւ Ատրպէյճանի կողմէ Արդարադատութեան Միջազգային Դատարանի պարտադիր իրաւական ուժ ունեցող որոշումներու չկատարման ու խաղաղութեան գործընթացի վիժեցման:
Մասնաւորապէս, վարչապետը նշած է.
“Լեռնային Ղարաբաղում մարդասիրական ճգնաժամը շարունակում է խորանալ ու ծաւալուել: 2022 թուականի Դեկտեմբերից Ատրպէյճանը Լաչինի միջանցքի ապօրինի արգելափակման միջոցով արգելել էր առեւտրային մատակարարումները դէպի Լեռնային Ղարաբաղ: Այսինքն՝ Լեռնային Ղարաբաղում գործող խանութները, դեղատները 2022 թուականի Դեկտեմբերից իրենց վաճառքի տեսականու արտաքին մատակարարում ընդհանրապէս չեն ունեցել:
“Սոյն թուականի Յունիսի 15-ից Ատրպէյճանն արգելափակել է նաեւ դէպի Լեռնային Ղարաբաղ մարդասիրական բեռների, այդ թւում՝ մանկական սննդի եւ դեղորայքի մատակարարումները այդ թւում՝ Կարմիր Խաչի միջազգային կազմակերպութեան միջոցով:
“Լեռնային Ղարաբաղում մարդասիրական ճգնաժամի պայմաններում Լեռնային Ղարաբաղի ժողովրդին աջակցութեան Հայաստանի Հանրապետութեան կառավարական յանձնաժողովը՝ աշխատանքային խումբը դեռեւս սոյն թուականի Յուլիսի 26-ին դէպի Լեռնային Ղարաբաղ մարդասիրական բեռներ ուղարկելու որոշում էր կայացրել: Դէպի Լեռնային Ղարաբաղ ուղեւորուած 19 բեռնատարները շարունակում են կանգնած մնալ Սիւնիքի մարզի Կոռնիձոր գիւղի հատուածում Լաչինի միջանցքի մօտ: Ուզում եմ յիշեցնել, որ այդ 19 բեռնատարների պարունակութիւնը հետեւեալն է. ալիւր՝ 100 թոն, մաքարոնեղէն՝ 80 թոն, շաքարաւազ՝ 60 թոն, բուսական իւղ՝ 40 թոն, կաթի փոշի՝ 40 թոն, աղ՝ 20 թոն, մանկական կեր՝ 12 թոն, դեղորայք՝ 9 թոն, ընդհանուր առմամբ՝ 361 թոն: Բեռի այս պարունակութիւնը հաւաստուել է Հայաստանում հաւատարմագրուած դիւանագէտներին, եւ ցանկացած պահի կարող է վերահաստատուել Կոռնիձորում արդէն 16 օր կայանուած բեռնատարների զննմամբ:
“Հետագայում, մարդասիրական շարասիւնին միացել են եւս երկու բեռնատար՝ 9 թոն քաղցրեղէն, մասնաւորապէս՝ 30 անուն շաքարեղէններ եւ թխուածքաբլիթ արտադրող ընկերութեան կողմից եւ 1 բեռնատար 1 կցորդիչով 25 թոն մաքարոնեղէնով Փարիզի քաղաքապետի եւ Ֆրանսայի Իլ տը Ֆրանս, Օվերնյ-ռոն-ալփ, Օ տը Ֆրանս, Օքսիթանիա, Լուարի երկիր երկրամասերի վարչական ղեկավարների անունից:
“Մարդասիրական բեռների մուտքը Լեռնային Ղարաբաղ արգելափակելը չի տրւում ոչ մի բացատրութեան: Ինչպէս հասկացաք, այս լրացուցիչ բեռները նոյնպէս դէպի Լեռնային Ղարաբաղ մուտք գործելու հնարաւորութիւն չունեն:
“Եթէ մի պահ մարդասիրական բեռների մուտքը Լեռնային Ղարաբաղ արգելափակելու Ատրպէյճանի այս գործելակերպը չդիտարկենք Լեռնային Ղարաբաղի հայութեանը ցեղասպանութեան ենթարկելու Ատրպէյճանի բացայայտ քաղաքականութեան ծիրին մէջ. այսինքն՝ բացատրութիւն չկայ, եթէ այս հանգամանքը մի կողմ դնենք: Աւելի ճիշդ՝ Լեռնային Ղարաբաղ մարդասիրական բեռների մուտքի արգելքն առաւել հաւաստի են դարձնում Լեռնային Ղարաբաղի հայութեանը ցեղասպանութեան ենթարկելու Ատրպէյճանի կողմից վարուող քաղաքականութեան մասին յայտարարութիւնները: Իսկապէս, միջազգային փորձագիտական շրջանակներից հնչում են կարծիքներ՝ աւելի ու աւելի բարձր, որ Լաչինի միջանցքի ապօրինի արգելափակման հետեւանքով Լեռնային Ղարաբաղում մարդասիրական ճգնաժամ յարուցելու Ատրպէյճանի քաղաքականութիւնը կարող է դիտարկուել ցեղասպանութեան յանցագործութիւնը կանխելու եւ դրա համար պատժի մասին ՄԱԿ-ի 1948 թուականի Դեկտեմբերի 9-ի Ուխտի դիտանկիւնից:
“Կարծում եմ, որ Լաչինի միջանցքի ապօրինի արգելափակման հետեւանքով Լեռնային Ղարաբաղում յառաջացած մարդասիրական ճգնաժամը ծաւալուել է այն աստիճանի, որ պէտք է աւելի մեծ ջանքեր գործադրել ստեղծուած իրավիճակին միջազգային իրաւական գնահատական տալու ուղղութեամբ՝ մանաւանդ, որ Ատրպէյճանը շարունակում է չկատարել Արդարադատութեան Միջազգային Դատարանի սոյն թուականի Փետրուարի 22-ի եւ Յուլիսի 6-ի պարտադիրիրաւական ուժ ունեցող որոշումները Լաչինի միջանցքով մարդկանց, բեռների, փոխադրամիջոցների անարգել տեղաշարժն ապահովելու մասին:
“Ուշադրութեան արժանի է այն փաստը, որ միջազգային ամենաբարձր ատեանները վերջին շրջանի իրենց յայտարարութիւններով ամրագրեցին, որ Արդարադատութեան Միջազգային Դատարանի Փետրուարի 22-ի եւ Յուլիսի 6- ի որոշումներին Ատրպէյճանի տուած մեկնաբանութիւնները որեւէ կապ չունեն իրականութեան հետ եւ որ Ատրպէյճանը պարտաւոր է ապահովել Լաչինի միջանցքի անխափան աշխատանքը:
“Դուք յիշում էք, որ յատկապէս Յուլիսի 6-ի որոշումից յետոյ, Ատրպէյճանը փորձում էր ներկայացնել, թէ Յուլիսի 6-ի որոշմամբ Արդարադատութեան Միջազգային Դատարանն արձանագրել է, որ Փետրուարի 22-ի որոշումը կատարուած է, եւ դրան անդրադառնալու անհրաժեշտութիւն չկայ: Մինչդեռ սեւով սպիտակի վրայ բոլորովին այլ բան էր գրուած: Ես անձամբ այդ որոշումը կարդացել եմ: Բայց Ատրպէյճանը շարունակում էր այդ մեկնաբանութիւնները ու շատ կարեւոր էր, որ միջազգային ատեանները, այդ թւում՝ Միացեալ Ազգերի Կազմակերպութեան բարձր ներկայացուցիչները, միջազգային գործընկերներն արձանագրեցին Լաչինի միջանցքի հետ կապուած իրավիճակի իրենց վերաբերմունքը հէնց Արդարադատութեան Միջազգային Դատարանի Փետրուարի 22-ի եւ Յուլիսի 6-ի իրաւական պարտադիր ուժ ունեցող որոշումների ծիրին մէջ:
Առաւել եւս այս պայմաններում պիտի արձանագրեմ, որ ստեղծուած իրավիճակի լաւագոյն լուծումը Ատրպէյճանի կողմից Լաչինի միջանցքի ապօրինի արգելափակման վերացումն է, Ստեփանակերտ-Պաքու երկխօսութեան մեկնարկը միջազգային մեխանիզմի շրջանակներում:
հայաստանի Հանրապետութիւնն իր հերթին շարունակում է վերահաստատել իր հաւատարմութիւնը խաղաղութեան օրակարգին եւ պաշտօնական Պաքուին կոչ է անում ձեռնպահ մնալ խաղաղութիւն հաստատելու պատմական հնարաւորութիւնը զրոյացնելուն ուղղուած քայլերից»:
