Վերջին կէս տարուան ընթացքին կառավարութեան ամենամեծ ձեռքբերումները դիւանգիտական կապերու զարգացումն ու ճանապարհներու բարեկարգումն են, իսկ ամենամեծ ձախողումը` Լաչինի միջանցքի փակ ըլլալն ու ղարաբաղեան հարցի տապալումը: Հարցման այսպիսի արդիւնքներ ստացուած են IRI-ի` Միջազգային Հանրապետական Հիմնարկի, նախաձեռնած հետազօտութեան միջոցով: Տուեալները հաւաքուած են Հայաստանի մէջ Յունուարէն մինչեւ Մարտ ինկած ժամանակահատուածին:
Հայաստանի մէջ ժողովրդավարութեան զարգացմամբ բաւարարուած է հարցուածներուն 17 տոկոսը, 42 տոկոսը կը համարէ, որ փոփոխութիւնները դանդաղ կ’ընթանան, իսկ 35 տոկոսը կը կարծէ, թէ որեւէ փոփոխութիւն տեղի չ’ունենար:
Ապագային կը հաւատայ հարցուածներուն 18 տոկոսը, 26-ը միայն յոյս ունի, որ ապագան որոշ չափով աւելի լաւ պիտի ըլլայ, 35 տոկոսը վախ ունի ապագայի նկատմամբ, 20 տոկոսն ալ կը նշէ, որ հաւատքը լրիւ կորսնցուցած է: Ընդ որում, ապագայի հանդէպ աւելի լաւատես են տղամարդիկ, քան կանայք, ըստ զբաղուածութեան խումբերու` ամենալաւատեսը թոշակառուներն են:
Հարցուածներուն 44 տոկոսին կարծիքով` Հայաստանի մէջ առկայ հիմնական խնդիրները ազգային անվտանգութիւնն ու սահմաններն են: Խնդիրներու շարքին 2-րդ տեղը գործազրկութիւն է, ապա՝ աղքատութիւնը, իսկ 8 տոկոսին գնահատմամբ, գլխաւոր խնդիրը ռազմական ոլորտի բարեփոխումներու անհրաժեշտութիւնն է:
Քաղաքական գործիչներէն ամենամեծ վստահութիւնը կը վայելէ վարչապետ Նիկոլ Փաշինեանը` հարցուածներու 13 տոկոսին գնահատմամբ, 2-րդ տեղը` արտաքին գործերու նախարար Արարատ Միրզոյեանն է, 2 տոկոսի վստահութիւնը կը վայելէ Հայաստանի երկրորդ նախագահ Ռոպերթ Քոչարեանը, 1 տոկոսի վստահութիւնը` «Հանրապետութիւն» կուսակցութեան նախագահ Արամ Սարգսեանը, իսկ հարցուածներուն մեծ մասը` 64 տոկոսը, նշած է, որ ոեւէ մէկուն չի վստահիր:
Ո՞ր կուսակցութեան կամ դաշինքին կու տայիք ձեր ձայնը, եթէ խորհրդարանական ընտրութիւնները տեղի ունենային յաջորդ Կիրակի: Հարցուածներուն 21 տոկոսը նշած է, որ ձայն կու տար «Քաղաքացիական Պայմանագիր»ին, 4 տոկոսը` «Հայաստան» դաշինքին, 3 տոկոսը` «Բարգաւաճ Հայաստան»ին, իսկ 4-րդ տեղը «Հանրային Ձայն» կուսակցութիւնն է, որուն համահիմնադիրը «Տոկ» ծածկանունով, հայհոյախառն եութուպեան եթերներով յայտնի Վարդան Ղուկասեանն է` ոստիկանութեան նախկին աշխատակից: Ընդ որում, վերջին` 2021 թուականի ընտրութիւններուն ՔՊ-ն ստացած էր ձայներունի 53 տոկոսը, «Հայաստան» դաշինքը` 21:
Ի՞նչ ակնկալիքներ ունին հարցման մասնակիցները կառավարութենէն: 12 տոկոսը կը համարէ, որ կառավարութիւնը պէտք է բարելաւէ բանակային պայմանները, ուշադրութեան կեդրոնին պահէ ազգային անվտանգութեան հարցերը ու պահպանէ սահմանները: 9 տոկոսին համար առաջնային է խաղաղութեան հաստատումը: Մարդոց եւս 9 տոկոսը իշխանութիւններէն կ’ակնկալէ Լաչինի միջանցքի բացում, միեւնոյն ժամանակ Լաչինի միջանցքի փակ ըլլալը հարցուածներուն մեծ մասը համարած է կառավարութեան ամենամեծ ձախողումը:
Փտածութիւն․ հարցուածներուն 41 տոկոսը կը շարունակէ համարել, որ փտածութեան շատ մեծ խնդիր է Հայաստանի մէջ: Ընդ որում, Հայաստանի բնակիչներուն կարծիքով` փտածութիւնը ամենաշատ առկայ է առողջապահութեան համակարգին, ապա դատարաններուն ու մաքսային ծառայութիւններուն մէջ:
Արտաքին քաղաքականութեան մասին. հարցուածներուն 63 տոկոսը յարաբերութիւնները շատ լաւ կը գնահատէ Ֆրանսայի հետ, 2-րդ տեղը Իրանն է, ապա՝ ԱՄՆ ու ԵՄ, իսկ Ռուսիոյ հետ յարբերութիւնները շատ լաւ կը գնահատէ միայն հարցուածներուն 10 տոկոսը: 49 տոկոսին կարծիքով ալ` Հայաստանի ռազմավարական դաշնակից Ռուսիոյ հետ յարաբերութիւնները շատ վատ կամ որոշ չափով վատ են: Միւս կողմէ, հարցուածներուն 50 տոկոսը կը կարծէ, որ Ռուսիան Հայաստանի համար կարեւոր քաղաքական գործընկեր է, սակայն Ռուսիայէն կարեւոր համարուած են Ֆրանսան, Իրանն ու Միացեալ Նահանգները:
Ո՞ր երկիրները կը ներկայացնեն քաղաքական սպառնալիք Հայաստանի համար. առաջին տեղը Ատրպէյճանն է, ապա՝ Թուրքիան, իսկ 3-րդ տեղը, հարցուածներուն 24 տոկոսին կարծիքով, Ռուսիան է:
Ի՞նչ խնդիրներ պէտք է լուծէ Երեւանի նոր քաղաքապետը. ըստ հարցուածներու մեծամասնութեան` առաջնային խնդիրը փոխադրութեան հարցն է, ապա՝ աղբահանութեան ու կանաչապատման:
