Ատրպէյճանի նախագահ Իլհամ Ալիեւի պնդմամբ` Երեւանի մէջ Ծանրամարտի Եւրոպայի ախոյեանութեան բացման արարողութեան ընթացքին իր երկրի դրօշի այրման ետին կանգնած են Հայաստանի իշխանութիւնները:
«Ես կը կարծեմ, որ Երեւանի մէջ ընթացող Ծանրամարտի Եւրոպայի ախոյեանութեան ընթացքին Ատրպէյճանի դրօշի այրումը Հայաստանի իշխանութեան հերթական կեղտոտ արարքն է: Ես այդ կ’ընդունիմ այդպէս: Սա պատահականութիւն չէ եւ մէկ մարդու գործ չէ: Սա Հայաստանի իշխանութեան հերթական կեղտոտ գործողութիւնն է: Շատ պատճառներ կան այդ ըսելու համար», յայտնած է Ալիեւ պետական «AzTV» հեռուստաալիքին տուած հարցազրոյցին:
Անոր խօսքով` եթէ Հայաստանի քաղաքական ղեկավարութեան աչքին առջեւ նման իրադարձութիւն տեղի կ’ունենայ, եւ անոնց կողմէ արձագանգ չկայ, ապա «արարքին հեղինակը իշխանութիւնն է եւ ինքը` պետութիւնը»:
Յիշեցնենք, որ Ապրիլ 14-ին Երեւանի մէջ Ծանրամարտի Եւրոպայի ախոյեանութեան բացման արարողութեան ժամանակ տղամարդ մը այրեց Ատրպէյճանի դրօշը, ինչին հետեւանքով այդ երկրին հաւաքականը լքեց ախոյեանութիւնը: Հայաստանի Կրթութեան, Գիտութեան, Մշակոյթի եւ Մարմնակրթութեան նախարարութիւնը մարզական բարոյականութեան տեսանկիւնէն մտահոգիչ որակեց Պաքուի որոշումը` ընդգծելով, որ «միջադէպը, որ շատ արագ հարթուած է, որեւէ առնչութիւն չունի մարզիկներու անվտանգութեան եւ անոնց բնականոն մրցելոյթներու ապահովման հետ»: