Ռուսիոյ Արտաքին Գործերու Նախարարութեան պաշտօնական ներկայացուցիչ Մարիա Զախարովան ըսած է, որ Ատրպէյճանը եւ Հայաստանը ընդունած են Ռուսիոյ մէջ հանդիպելու առաջարկը` քննարկելու կողմերուն միջեւ խաղաղութեան համաձայնագիրը: Ճշգրիտ միջոցառումներու ժամկէտերը պիտի յայտարարուին, երբ ամէն ինչ վերջնականապէս համաձայնեցուած ըլլայ, նշած է ան:
«Մեր ջանքերը չեն թուլանար` բազմակողմանիօրէն աջակցելու համար Ատրպէյճանին եւ Հայաստանին նախապատրաստելու խաղաղութեան համաձայնագիրը այդ երկիրներուն միջեւ», ըսած է Զախարովան:
Հայաստանի Արտաքին Գործերու Նախարարութենէն յառաջիկայ հանդիպման մասին մանրամասնութիւններ չյայտնեցին, խօսնակը միայն փոխանցեց, որ նախարարի այցերուն ու հանդիպումներուն մասին պատշաճ ժամկէտի մէջ պիտի տեղեկացնեն:
Զախարովան նախօրէի զինուած ընդհարման մասին ըսած է, որ տեղի ունեցածը եւս մէկ անգամ կը հաստատէ, որ Պաքուն եւ Երեւանը պէտք է փոխադարձաբար զսպուածութիւն ցուցաբերեն եւ անշեղօրէն հաւատարիմ մնան Ռուսիոյ, Ատրպէյճանի եւ Հայաստանի առաջնորդներու եռակողմ համաձայնութիւններուն:
Անոր ըսելով` նախօրէի միջադէպի շրջանին մէջ գտնուող Ռուսիոյ զինուած ուժերու եւ սահմանապահներու ներկայացուցիչները անյապաղ կապուած են Հայաստանի եւ Ատրպէյճանի համապատասխան մարմիններուն հետ եւ լարուածութիւնը թուլցնելու միջոցներու ձեռնարկած են: