Ծաղկազարդի եւ մանուկներու օրհնութեան օրուընէ սկսեալ` յառաջիկայ շաբթուան ընթացքին, Արցախի Հանրապետութեան շուրջ 12.500 երեխայ նուէրներ պիտի ստանան «Մենք ենք մեր սարերը» տարածքային զարգացման գործակալութեան կողմէ:
«Նուէրներ` Արցախի երեխաներուն» ծրագիրը գործակալութիւնը նախաձեռնած էր դեռ անցած տարեվերջին: Գործակալութեան` աշխարհի տարբեր երկիրներու մէջ բնակող նուիրատուներու կողմէ այդ նպատակին համար նուիրաբերուած միջոցներով նուէրները գնուած էին մինչեւ Արցախի շրջափակումը: Նուէրներու յանձնումը կը նախատեսուէր Ամանորի նախաշեմին, սակայն Դեկտեմբեր 12-էն սկսեալ շրջափակման պատճառով տօնական անակնկալը չստացուեցաւ:
Շրջափակման ամիսներու ընթացքին հնարաւոր եղած էր Գորիսի մէջ պահուող նուէրները մաս-մաս տեղափոխել Արցախ, եւ Ապրիլ 2-էն արդէն մեկնարկած է փաթեթներու բաժանումը հասցէատէրերուն ինչպէս Ստեփանակերտի, այնպէս ալ Մարտունիի, Մարտակերտի ու Ասկերանի շրջաններուն մէջ: