Արեւմտեան երկիրները խաթարած են հայ-ատրպէյճանական կարգաւորման ուղղութեամբ ջանքերը` ԵԱՀԿ Մինսքի Խումբը «աղբանոց ուղարկելով»: Այս մասին ամէնշաբաթեայ ճեպազրոյցին ժամանակ յայտնած է Ռուսիոյ Արտաքին Գործերու Նախարարութեան պաշտօնական ներկայացուցիչ Մարիա Զախարովան: Այսպէս ան մեկնաբանած է ԱՄՆ Պետական Քարտուղարութեան յայտարարութիւնը, որ իր հերթին կը մեղադրէր Ռուսիան ԵԱՀԿ Մինսքի Խումբի ձեւաչափին մէջ հայ-ատրպէյճանական կարգաւորման ուղղուած ջանքերը խաթարելու մէջ:
«Եթէ ոեւէ մէկը խաթարած է հայ-ատրպէյճանական կարգաւորման ջանքերը, ապա այդ կատարած են իրենք` արեւմտեան երկիրները` ԱՄՆ-ի գլխաւորութեամբ: ԵԱՀԿ Մինսքի Խումբի ձեւաչափը պատմութեան աղբանոց ուղարկուած է այն բանէն յետոյ, երբ ամերիկացի եւ ֆրանսացի համանախագահները մտացածին պատրուակով 2022-ի Փետրուարին դադրեցուցին փոխգործակցութիւնը ռուս գործընկերոջ հետ», ըսած է Զախարովան:
Դիւանագէտը նշած է, որ այդ գործողութիւններուն բացատրութիւնը չէ տրուած:
«Այդ հաշուի առնելով` մենք կեդրոնացած ենք եռակողմ ձեւաչափերու ծիրին մէջ Երեւանին եւ Պաքուին օգնութիւն տրամադրելու վրայ` հիմնուելով ամենաբարձր մակարդակով համապատասխան համաձայնագրերուն վրայ, ինչի մասին բազմիցս խօսած ենք», ըսած է ան:
Ինչ կը վերաբերի հայ-ատրպէյճանական կարգաւորման հարցով ԱՄՆ-ի միջնորդութեան, ապա, ըստ Զախարովայի, Ռուսիոյ Արտաքին Գործերու Նախարարութիւնը չի տեսներ, որ «այն յագեցած ըլլայ իրական քայլերով եւ որեւէ աւելցուած արժէք ունենայ»:
