Ռուսիոյ Դաղնութիւն աշխատանքային այցի շրջանակին մէջ Օգոստոս 16-ին կայացած է ՀՀ պաշտպանութեան նախարար Սուրէն Պապիկեանի հանդիպումը Ռուսիոյ պաշտպանութեան նախարար, բանակի հրամանատար Սերկէյ Շոյկուի հետ:
Ռազմավարական դաշնակից երկու երկիրներու պաշտպանական գերատեսչութիւններու ղեկավարները քննարկած են տարածաշրջանային անվտանգութեան առնչուող շարք մը հարցեր:
Սուրէն Պապիկեանը ներկայացուցած է հայ-ատրպէյճանական սահմանին, ինչպէս նաեւ Արցախի մէջ վերջին շրջանին արձանագրուած զարգացումները եւ նշած է, որ իրավիճակը կը շարունակէ լարուած մնալ:
Կողմերը կարեւորած են իրադրութեան հետեւողական ու շարունակական կայունացման ուղղութեամբ քայլերու ձեռնարկման անհրաժեշտութիւնը, շեշտադրելով Արցախի մէջ խաղաղապահ առաքելութիւն իրականացնող ռուսական զօրախումբին դերակատարութիւնը այդ հարցով:
Հայաստանի եւ Ռուսիոյ պաշտպանական գերատեսչութիւններու ղեկավարները գոհունակութիւն յայտնած են հայ-ռուսական ռազմական համագործակցութեան ներկայ մակարդակին առնչութեամբ եւ քննարկած են փոխգործակցութեան հետագայ խորացման ծրագրերն ու հնարաւորութիւնները:
Կարծիքներ փոխանակուած են նաեւ միջազգային անվտանգութեան հիմնախնդիրներու շուրջ:
