Արցախի նախագահ Արայիկ Յարութիւնեան հերքած է լուրերը, թէ Պաշտպանութեան բանակն ու Արտգործնախարարութիւնը պիտի կազմալուծուին։ Ֆեյսպուքի իր էջին վրայ ան գրած է, որ կրկին ակտիւացած են ապատեղեկատուական հոսքերը Արցախի շուրջ՝ գլխաւորապէս հայկական շրջանակներէն:
«Ում խելքին ինչ փչում է կամ ում նեղ անձնական շահերն ինչ թելադրում են, այն էլ ասում է՝ առանց մտածելու, որ դրանով յանցաւոր կերպով խաղում է Արցախի ճակատագրի ու ժողովրդի նեարդերի հետ:
«Մասնաւորապէս, մէկը գրում է, թէ իբր բանակն ու արտաքին գործերի նախարարութիւնն ենք կազմալուծելու, միւսը՝ իբր Կարմիր շուկայ–Շուշի ճանապարհից ենք հրաժարուելու, երրորդը՝ իբր ատրպէյճանական դրօշ ենք դնելու Ստեփանակերտում, եւ այլն, եւ այլն: Բոլորն էլ ցնդաբանութիւններ են, եւ պարզապէս բացառւում է, որ Արցախի իշխանութիւնները համաձայնուեն արտաքին ու ներքին թշնամիների բաղձանքներին: Պաշտօնապէս պահանջում եմ բոլորից ձեռք քաշել Արցախի անունը եւ ժողովրդի յոյզերը շահարկելուց», – գրած է Արցախի նախագահը:
Ան շեշտած է, որ Արցախի պետական բոլոր մարմինները կ՛աշխատին եւ պիտի շարունակեն աշխատիլ, որքան որ ալ դժուար պայմաններ ու չկամեցող մարդիկ ըլլան: «Սակայն գլխաւոր ցաւն այն է, որ չկամեցողների մէջ կան նաեւ հայ ազգի ներկայացուցիչներ: Շատ կ’ուզէի, որ բոլորիս էներգիան ու ջանքերն ուղղուած լինէին Արցախի վերականգնման ու զարգացման, անվտանգութեան ապահովման, կորստեան ցաւի սփոփման եւ գերիների ու անհետ կորածների հիմնախնդրի լուծման ուղղութեամբ՝ եղած արժէքներն էլ աւելի թուլացնելու փոխարէն», – եզրափակած է Յարութիւնեան:
