Կառավարութենէն հաղորդած են, որ վարչապետի՝ Նիկոլ Փաշինեանի եւ Հայաստանի նախկին նախագահներու հանդիպումը չէ եղած։ Հայաստանի ու Լեռնային Ղարաբաղի նախկին հինգ նախագահներու հանդիպման մանրամասնութիւններ չեն հրապարակուիր։
Առաջին նախագահ՝ Լեւոն Տէր Պետրոսեանի խօսնակ՝ Արման Մուսինեան դիմատետրին գրած է. «Արցախի եւ Հայաստանի ներկայ մտահոգիչ իրավիճակով պայմանաւորուած տեղի է ունեցել խորհրդակցութիւն, որին մասնակցել են Հայաստանի նախկին նախագահներ՝ Լեւոն Տէր Պետրոսեանը, Ռոպերթ Քոչարեանը, Սերժ Սարգսեանը եւ Արցախի նախկին նախագահներ՝ Արկադի Ղուկասեանը եւ Բակօ Սահակեանը»:
Տէր Պետրոսեանի խօսնակ՝ Արման Մուսինեանն ու Սերժ Սարգսեանի ղեկավարած Հանրապետականի մամլոյ քարտուղար՝ Էտուարտ Շարմազանովը հրաժարեցան այսօրուայ հանդիպման մասին յաւելեալ մեկնաբանութիւններէն։
Երէկ՝ Հոկտեմբեր 21-ին, Արցախի նախկին նախագահները առանձին հանդիպած էին Ռոպերթ Քոչարեանին ու Լեւոն Տէր Պետրոսեանին հետ։ Երեւան գտնուող Արկադի Ղուկասեանն ու Բակօ Սահակեանը մէկ հանդիպում ալ Հայաստանի վարչապետ՝ Նիկոլ Փաշինեանին հետ ունեցած էին: Թեման, ըստ կառավարութեան հաղորդագրութեան, Լեռնային Ղարաբաղի մէջ ստեղծուած իրավիճակն ու դիմագրաւելու ուղղութեամբ քայլերն էին։
