Այսպիսով, կառավարութիւնը, ըստ էութեան կը պահպանէ նախորդ վարչակարգի սուփըրվարչապետական համակարգը, եւ նախագիծը այս տեսքով ԱԺ ներկայացուելու պարագային Լուսաւոր Հայաստան խմբակցութիւնը կը պատրաստուի ներկայացնել իր առաջարկները, որոնք չընդունուելու պարագային դէմ պիտի քուէարկէ նախագիծին։ Այս մասին ֆէյսպուքեան իր էջին մէջ գրած է Լուսաւոր Հայաստան կուսակցութեան նախագահ Էտմոն Մարուքեանը։
Ստորեւ կը ներկայացնենք Էտմոն Մարուքեանի գրութիւնը ամբողջութեամբ։
«Սիրելի՛ քաղաքացիներ, համացանցում մի քանի ժամ առաջ հրապարակուել է ՀՀ կառավարութեան կառուցուածքի եւ գործունէութեան մասին օրէնքում կառավարութեան կողմից առաջարկուող փոփոխութիւնների նախնական տարբերակը։ Նախագծի ուսումնասիրութիւնից պարզ է դառնում, որ գործադիրը ծրագրում է փոփոխութեան ենթարկել հիմնականում նախարարութիւնների, ինչպէս նաեւ որոշ տեսչութիւնների կազմն ու կառուցուածքը։
Ուժային կառոյցները (ոստիկանութիւն եւ ԱԱԾ), ինչպէս նախկին վարչակարգի օրօք, մնում են վարչապետի ենթակայութեան տակ։
Աւելին, հարկային եւ մաքսային մարմինները միաւորող պետական եկամուտների կոմիտէն մնում է կառավարութեան իրաւասութեան ներքոյ։
Այսինքն, խորհրդարանական վերահսկողութեան դաշտ այդ մարմիններն այդպէս էլ չեն տեղափոխւում եւ օրէնսդիր իշխանութեանը հաշուետու չեն դառնում։
Յիշեցնենք, որ այդ մարմիններին խորհրդարանական վերահսկողութեան տակ առնելու վերաբերեալ դրոյթներն առկայ են եղել Ելք դաշինքի առաջարկներում:
Այսպիսով, կառավարութիւնը, ըստ էութեան պահպանում է նախորդ վարչակարգի սուփըրվարչապետական համակարգը, եւ նախագիծն այս տեսքով ԱԺ ներկայացուելու դէպքում Լուսաւոր Հայաստան խմբակցութիւնը պատրաստւում է ներկայացնել իր առաջարկները, որոնք չընդունուելու պարագայում դէմ կը քուէարկի նախագծին։
Ինչ վերաբերում է կառավարութեան կառուցուածքին եւ նախարարութիւնների թիւի եւ գործառոյթների կրճատմանն ու հնարաւոր հետեւանքներին, այդ հարցերին կ’անդրադառնանք առանձին՝ աւելի ուշ։
