Գերմանիոյ սահմանադրական դատարանը մերժած է Պունտեսթակի՝ Հայոց ցեղասպանութիւնը ճանչցող որոշման դէմ ներկայացուած հայցը: Այս մասին կը տեղեկացնէ թրքական «Doğan» լրատուական գործակալութիւնը:
Ծագումով թուրք փաստաբան Ռամազան Աքպաշ դիմած էր սահմանադրական դատարան՝ պահանջելով չեղարկել Հայոց ցեղասպանութիւնը ճանչցող ու դատապարտող խորհրդարանական որոշումը:
«Doğan»-ի հետ զրոյցին Աքպաշ ըսած է, որ Գերմանիոյ դատարանը իր ներկայացուցած հայցադիմումը վարոյթ չէ ընդունած: Որպէս հիմնաւորում դատարանը նշած է, որ չկան բաւարար ապացոյցներ այն մասին, թէ Պունտեսթակի որոշումը կը ոտնահարէ հայցուորի հիմնարար կամ յարակից իրաւունքները:
Թուրք փաստաբանը աւելցուցած է, որ իրենք արդէն ստացած են դատարանի վճիռը եւ կը պատրաստուին յառաջիկային հայց ներկայացնել նաեւ Մարդու իրաւունքներու եւրոպական դատարան (ՄԻԵԴ): Աքպաշ նշած է նաեւ, որ Հայոց ցեղասպանութիւնը դատապարտող բանաձեւի դէմ 8 տարբեր հայցեր ներկայացուած են Գերմանիոյ սահմանադրական դատարան: