ԱՄՆ նախագահական ընտրութիւններուն Հայաստանի համար նախընտրելի է՝ Դեմոկրատական կուսակցութեան թեկնածուի յաղթանակը, ըսաւ Միջազգային եւ անվտանգութեան հարցերու հայկական կեդրոնի ղեկավար, քաղաքագէտ Ստեփան Սաֆարեանը:
Անոր խօսքով՝ Հայաստանին ձեռնտու չէ ԱՄՆ Հանրապետական կուսակցութեան քաղաքականութիւնը: «Եթէ յիշենք հանրապետական նախագահների կառավարման տարիները, ապա Ճորճ Պուշի պաշտօնավարման շրջանում Հայաստանին, ըստ էութեան, նշանակութիւն չէր տրուում: Կովկասում գոյութիւն ունէր Վրաստան-ԱՄՆ քաղաքական համագործակցութիւնը եւ ոչ աւելին: Այս ժամանակահատուածում Հայաստանն է՛լ աւելի խորասուզուեց «ռուսական ճահճի» մէջ», նշեց Ստեփան Սաֆարեանը՝ շարունակելով, որ հակառակը՝ Պարաք Օպաման եւ դեմոկրատները բացն Հայաստանի «հարաւային դարպասները»:
«Օպաման ընդգծեց Հայաստանի դերը, ԱՄՆ պետքարտուղարը երկու անգամ Հայաստան այցելեց: Այս ենթատեքստում Հայաստանին լուրջ նշանակութիւն տրուեց Իրանի եւ Եւրոպայի հաղորդակցութեան հարցում: Հաշուի առնելով այսպիսի տարբեր բեւեռները՝ երբ հանրապետականները Վրաստանից եւ Թուրքիայից բացի, ոչինչ չեն տեսնում, իսկ միւս կողմից՝ դեմոկրատների եւ Օպամայի քաղաքականութիւնը Հայաստանին աւելի մեծ համայնապատկեր է ապահովում, կարծում եմ, որ մեզ համար, իհարկէ, դեմոկրատների յաղթանակն է ցանկալի»,- ընդգծեց Սաֆարեանը՝ շարունակելով, որ, իհարկէ, մենք հիասթափուել ենք Դեմոկրատական կուսակցութեան ներկայացուցիչներից այն պատճառով, որ «ցեղասպանութիւն» բառը չեն արտասանել: «Դա վերաբերում է եւ՛ Օպամային, եւ՛ Քլինթընին: Այդուհանդերձ, մենք պէտք է գիտակցենք, որ նրանք Հայաստանին աւելի մեծ նշանակութիւն են տուել»,- նշեց Ստեփան Սաֆարեանը:
Անդրադառնալով Օպամայի նախագահութեան շրջանին Ռուսաստան- Արեւմուտք դիմակայութեան աճին՝ քաղաքագէտը նշեց, որ այդ նոյնպէս ԱՄՆ Դեմոկրատական կուսակցութեան վարած քաղաքականութեան հետեւանքն է: «Արեւմուտք-Ռուսաստան դիմակայութեան ֆոնին Հայաստանի խնդիրներն, իհարկէ, աւելանում են, միւս կողմից՝ Հայաստանի համար նաեւ հնարաւորութիւններ են բացուում՝ գործառոյթների եւ պահանջվածութեան տեսակէտից Հայաստանի կշիռը մեծանում է: Ես վստահ եմ, որ Քլինթընի ընտրուելուց յետոյ, անկախ որեւէ բանից, Ռուսաստանի հանդէպ նրա քաղաքականութիւնն այդքան խիստ չի լինի, որքան նախընտրական արշաւի ընթացքում նրա հռետորաբանութիւնն էր»,- կը կարծէ Ստեփան Սաֆարեանը:
«Թուում է, թէ Ռուսաստանի հետ դիմակայութիւնը երրորդ համաշխարհային պատերազմի կը հանգեցնի, բայց ես համոզուած եմ, որ այդպիսի բան տեղի չի ունենայ: Այս տեսակէտից նախագահի ընտրութիւնից յետոյ երկխօսութիւնը չի զոհաբերուի դիմակայութեանը: Հետեւաբար՝ կարծում եմ, որ Հայաստանին ձեռնտու է Դեմոկրատական կուսակցութեան թեկնածուի յաղթանակը»,- ամփոփեց Ստեփան Սաֆարեանը: