Ռուսաստանի իրաւաբանական անձերու միասնական պետական գրանցամատեանին մէջ «Ուժեղ Հայաստան» դաշինքի առաջին համարի եւ կուսակցութեան խորհուրդի անդամ Նարեկ Կարապետեանի վերաբերեալ տուեալները խմբագրուած են։
Factor TV-ն կը յայտնէ, որ ստացած է նոր տեղեկանք, որուն մէջ արդէն կը նշուի, որ Նարեկ Կարապետեանը ոչ թէ Ռուսաստանի, այլ Հայաստանի քաղաքացի է։ Փոփոխութիւնը կատարուած է Մայիս 20-ին՝ օրուայ վերջը, ինչին վերաբերեալ հրապարակում կատարած է նաեւ Ազգային Ժողովի նախագահ, «Քաղաքացիական Պայմանագրի» պատգամաւորի թեկնածու Ալեն Սիմոնեանը ու նշած, որ փաստաթուղթը ինչ-որ պահու անհասանելի դարձած է, այնուհետեւ խմբագրուած է։
Նարեկ Կարապետեանի քաղաքացիութեան հարցին անդրադարձած է նաեւ Ռուսաստանի արտաքին գործերու փոխնախարար Միխայիլ Կալուզինը։ Ան յայտնած է, որ Կարապետեանը երբեք Ռուսաստանի քաղաքացիութիւն չէ ունեցած։
Նարեկ Կարապետեան, Մայիս 20-ին, Factor TV-ի լրագրողի հարցումին ի պատասխան, եւս պնդած է, որ ՀՀ քաղաքացիութենէն բացի՝ այլ քաղաքացիութիւն երբեք չէ ունեցած․ «Իրաւաբանները դիմած են ՌԴ դեսպանատուն, ամենայն հաւանականութեամբ, որպէսզի պատասխան տրուի»,- նշած է ան։
Այդպէս ալ պաշտօնական պարզաբանում չէ տրուած այն մասին, թէ ինչու եւ ինչպէս Ռուսաստանի իրաւաբանական անձերու միասնական պետական գրանցամատեանին մէջ նարեկ Կարապետեանի անուան դիմաց նշուած եղած է ՌԴ քաղաքացի։ Արդեօ՞ք այդ սխալմունք եղած է, անփութութեան հետեւանք՝ յայտնի չէ։ Ռուս պաշտօնեան այս մասին պարզաբանում ներկայացնելու փոխարէն խօսած է հակառուսական ապատեղեկատուական քայլերու մասին։
