«Հայաստանը չի կրնար ըլլալ ե՛ւ Եւրասիական Տնտեսական Միութեան, ե՛ւ Եւրոմիութեան մէջ, ինչպէս կ’ըսեն՝ Հայաստանը պիտի չյաջողի միաժամանակ երկու հարսանիքներու պարել», յայտնած է ՌԴ արտաքին գործերու փոխնախարար Միխայիլ Կալուզին՝ դրացի երկիրներուն հետ փոխգործակցութեան հարցերով Ռուսաստանի Անվտանգութեան Խորհուրդի յատուկ խումբի նիստէն յետոյ։
Ըստ ռուսական լրատուամիջոցներու, Կալուզին նաեւ յայտնած է, որ Մոսկուայի համար անընդունելի է Հայաստանի իշխանութիւններուն դիրքորոշումը, որոնք մտադիր են պահպանել անդամակցութիւնը ԵԱՏՄ-ին, մինչեւ կը ստանան ԵՄ անդամակցութիւն։
Ռուսաստանի արտաքին գործերու փոխնախարարը նաեւ մեղադրած է Արեւմուտքը՝ Հայաստանը Ռուսաստանի դէմ օգտագործելու փորձի մէջ եւ յայտարարած, որ երկրին անդամակցութիւնը Եւրոմիութեան «ամբոխավարական կարգախօս է»՝ նման այն կարգախօսներուն, որոնք նախապէս օգտագործուած են Ուքրանիոյ եւ Մոլտովայի պարագային։
Կալուզինը ԵՄ-ն մեղադրած է «յառաջիկայ ընտրութիւններուն վրայ ազդելու» փորձերու մէջ ու յայտնած, որ «Ռուսաստանը, ի տարբերութիւն Եւրոմիութեան, չի միջամտեր Հայաստանի ներքին գործերուն»։
Մոսկուան յոյս ունի, որ հայ հասարակութիւնը «կը պահպանէ սառնասրտութիւնը» եւ թոյլ չի տար երկիրը ներքաշել Ռուսաստանի հետ առճակատման մէջ, ըսած է ՌԴ արտաքին գործերու փոխնախարարը:
