«ԹՐԻՓՓ չի լինելու Ատրպէյճանում, այն լինելու է միայն Հայաստանում»։
Այս մասին յայտնած է ՔՊ խմբակցութեան պատգամաւոր Արթուր Յովհաննիսեանը՝ Ազգային Ժողովի քառօրեայ նիստերն ամփոփող ճեպազրոյցի ժամանակ պատասխանելով այն հարցին, թէ ինչու ԹՐԻՓՓ-ի իրագործման պարագային Հայաստանի ու Ատրպէյճանի միջեւ մարդոց եւ բեռներու տեղաշարժի հայելային սկզբունք պիտի չգործէ։
«ԹՐԻՓՓ-ը Հայաստանի եւ ԱՄՆ-ի միջեւ ստորագրուած համաձայնագիր է։ ԹՐԻՓՓ չի լինելու Ատրպէյճանում, այն լինելու է միայն Հայաստանում։ Այն կարգաւորումները, որոնք արտայայտուած են ԹՐԻՓՓ համաձայնագրում, չեն կարող կիրառուել Ատրպէյճանում, Թուրքիայում կամ աշխարհի որեւէ այլ երկրում։ Մենք խօսում ենք Հայաստանի Հանրապետութիւնով անցնող ճանապարհի մասին, ինչի վերաբերեալ է ԹՐԻՓՓ համաձայնագիրը։ Միւս կողմից մենք խօսում ենք Հայաստանի եւ Ատրպէյճանի միջեւ յարաբերութիւնների կարգաւորման մասին։ Տեւական ժամանակ է՝ Հայաստանից անխոչընդոտ բեռնէր են տեղափոխւում Ատրպէյճանի տարածքով, նոյնը տեղի է ունենում հակառակ ուղղութեամբ։ Մեր այն պնդումը, որ հայելային պէտք է լինեն կարգաւորումները, որեւէ կերպ չեն չեղարկուել, բայց այդ ամէնը կապ չունի ԹՐԻՓՓ-ի հետ։
ԹՐԻՓՓ նախագիծը պէտք է տարբերակել Հայաստանի եւ Ատրպէյճանի միջեւ նախաստորագրուած խաղաղութեան համաձայնագրից, որում ԱՄՆ-ն ունի վկայի կարգավիճակ։ Ամէն ինչ լինելու է այնպէս, ինչպէս արձանագրուած է ստորագրուած փաստաթղթերում»,- ըսած է Արթուր Յովհաննիսեան։
