Եւրոմիութիւնը կը դատապարտէ Ռուսաստանի կողմէ Հայաստանի վրայ ճնշում գործադրելու որեւէ փորձ։
«Որպէս ինքնիշխան, ժողովրդավարական եւ անկախ երկիր՝ Հայաստանը ունի իր սեփական ուղին եւ գործընկերները ընտրելու բոլոր իրաւունքները»,- յայտնած է ԵՄ խօսնակ Անուար Էլ Անունին։
«Ռուսաստանը նպատակ ունի վնասել Հայաստանի տնտեսութեան եւ ազդել Հայաստանի մէջ խորհրդարանական ընտրութիւններու արդիւնքներուն վրայ»,- պնդած է ԵՄ խօսնակը՝ յաւելելով, որ Պրիւքսէլը պիտի շարունակէ աջակցել Հայաստանին՝ «նման հարկադրանքի փորձերը յաղթահարելու համար»։
Անցեալ շաբաթ օրը Մոսկուան Հայաստանէն ետ կանչեց իր դեսպանը՝ «խորհրդակցութիւններու» համար, նախագահ Փութինն ալ քննադատեց Հայաստանի մերձեցումը ԵՄ-ի հետ եւ կոչ ըրաւ «հնարաւորինս շուտ» հանրաքուէ կայացնելու եւ կողմնորոշուելու ԵՄ-ի ու ԵԱՏՄ-ի միջեւ։
Վերջին օրերուն Մոսկուան նաեւ շարք մը սահմանափակումներ մտցուցած է հայկական խմիչքներու, ծաղիկներու, միրգերու եւ բանջարեղէնի ներմուծման վրայ։
