«Յունիս 7-ին կայանալիք Հայաստանի վճռորոշ ընտրութիւններուն ընդառաջ կատարուած վերջին հարցախոյզը կը կանխատեսէ, որ վարչապետ Նիկոլ Փաշինեանի «Քաղաքացիական Պայմանագիր» կուսակցութիւնը կրնայ ստանալ կողմնորոշուած ընտրողներու քուէներուն մօտ 65 առ հարիւրը՝ ակնարկելով, որ ան կրնայ յառաջանալ դէպի ջախջախիչ յաղթանակ եւ զգալի մեծամասնութիւն ունենալ ապագայ խորհրդարանին մէջ։
«Breavis»-ի հարցախոյզը, որ իրականացուած է մայիս 5-11-ին՝ 1551 հարցուածներու մասնակցութեամբ, ցոյց կու տայ, որ «Քաղաքացիական Պայմանագիր»-ը յարմարաւէտ առաջատար դիրք պիտի գրաւէ մասնատուած ընդդիմութեան նկատմամբ, որոնցմէ քանի մը ուժեր կը վայելեն Ռուսաստանի աշխուժ աջակցութիւնը, մինչ ոչ մէկ կուսակցութիւն կը գերազանցէ 12 առ հարիւրը։
Եթէ յաջորդ Կիրակի կայանալիք քուէարկութիւնը հաստատէ հարցախոյզի կանխատեսումները, հայ ժողովուրդը Փաշինեանին պիտի շնորհէ վճռական մանտաթ մը՝ Հարաւային Կովկասի այս երկրի ռազմավարական վերակողմնորոշումը դէպի արեւմտամէտ ուղի ամրապնդելու համար՝ զայն տանելով Կրեմլի հետ առճակատման եւ ամրագրելով Ատրպէյճանի հետ Ղարաբաղի շուրջ պատմական խաղաղութեան համաձայնագիրը, ինչ որ աւելի պիտի խթանէ տարածաշրջանային կայունութիւնն ու համագործակցութիւնը։
Համաձայնագիրը ստորագրուած էր անցեալ տարի Սպիտակ Տան մէջ Ազրպէյճանի նախագահ Իլհամ Ալիեւի հետ՝ վերջ տալով երկու երկիրներուն միջեւ տասնամեակներ շարունակ տեւած հակամարտութեան։
«Breavis»-ի հարցախոյզը նաեւ կ՚ազդարարէ Երեւանի ազգային ռազմավարութեան վերանայումը եւ տասնամեակներ շարունակ ռուսական հետխորհրդային ուղեծիրին մէջ մնալէ ետք դէպի Արեւմուտք յետագայ շրջադարձը։
Վերջին շաբաթներուն ընթացքին Մոսկուան շարունակաբար մեծցուցած է ճնշումը Երեւանի վրայ՝ ներառեալ կարեւոր առեւտրական արգելքները, Եւրասիական Տնտեսական Միութեան (ԵԱՏՄ) անդամակցութեան կասեցման վերաբերեալ նախազգուշացումները, ինչպէս նաեւ Ռուսաստանի նախագահ Վլատիմիր Փութինի կողմէ Հայաստանի եւ Ուքրանիոյ միջեւ զուգահեռներու անցկացումը։ Ասիկա տեղի ունեցաւ օրեր ետք, երբ անոր ամերիկացի պաշտօնակից Տանըլտ Թրամփը Փաշինեանին յայտնած էր իր «ամբողջական եւ անվերապահ աջակցութիւնը»։
Նոր հարցախոյզի արդիւնքներուն հրապարակումը նաեւ կը համընկնի Ռուսաստանի կողմէ Հայաստանի մէջ իր դեսպանը՝ Սերգէյ Քոփիրքինը, «խորհրդակցութիւններու նպատակով» Մոսկուա հետ կանչելուն հետ, Եւրոպական Միութեան անդամակցութեան ուղին արագացնելու Երեւանի որոշումին շուրջ։
«Հայաստանի Հանրապետութեան մէջ Ռուսաստանի Դաշնութեան դեսպան Ս. Փ. Քոփիրքինը կանչուած է Մոսկուա խորհրդակցութիւններու համար՝ Հայաստանի ղեկավարութեան կողմէ Եւրոպական Միութեան հետ մերձեցման ուղղութեամբ ձեռնարկուած քայլերուն առնչութեամբ»,– շաբաթ օր յայտարարած է Ռուսաստանի արտաքին գործոց նախարարութիւնը։
Անկէ մէկ օր առաջ Կրեմլը շարունակած էր իր տնտեսական նախազգուշացումներու եւ միջոցառումներու յարձակումը՝ յայտարարելով, որ «ժամանակաւոր սահմանափակումներ» պիտի կիրարկէ որոշ հայկական միրգերու եւ բանջարեղէնի արտածման նկատմամբ։ Ասիկա կը միանայ հայկական հանքային ջուրերու, գինիներու եւ քոնեաքի նկատմամբ վերջերս սահմանուած արգելքներուն, այն բանէն ետք, երբ Մոսկուա սպառնացած էր դադրեցնել երկիրին համար կենսական նշանակութիւն ունեցող էժան կազի եւ նաւթի մատակարարումները։
Մօտ երեք միլիոն բնակչութիւն ունեցող Հայաստանը անցեալ տարի իր կազի 80 առ հարիւրէն աւելին ներմուծած էր Ռուսաստանէն։
Ուրբաթ օր նաեւ ԵԱՏՄ-ի ղեկավարները համատեղ յայտարարութիւն տարածեցին՝ զգուշացնելով Հայաստանը, որ ԵՄ-ին միանալու անոր ծրագիրները «լուրջ վտանգներ» կը պարունակեն անդամ բոլոր երկիրներու տնտեսական անվտանգութեան համար։
Աստանայի մէջ գումարուած գագաթաժողովին ընթացքին Ռուսաստանի, Պելառուսի, Ղազախստանի եւ Ղրղզստանի ղեկավարները կոչ ուղղեցին Երեւանին՝ հնարաւորինս շուտ կազմակերպելու համապետական հանրաքուէ մը ԵՄ-ի եւ Մոսկուայի գլխաւորած դաշինքին միջեւ Հայաստանի ընտրութեան վերաբերեալ։
Գագաթաժողովին ընթացքին Փութին նաեւ կրկնեց աւելի վաղ կատարած զուգահեռը Ուքրանիոյ եւ Հայաստանի միջեւ՝ յայտնելով Աստանայի մէջ հաւաքուած լրագրողներուն, թէ «Ուքրանիոյ ճգնաժամը սկսաւ այն պահուն, երբ Ուքրանիա փորձեց անդամակցիլ Եւրոպական Միութեան»։
Թէեւ ԵԱՏՄ-ի յայտարարութիւնը կը վերաբերէր միայն Հայաստանի պրոեւրոպական ուղղուածութեան, ան հրապարակուեցաւ ընդամէնը մէկ օր ետք, երբ Թրամփը Փաշինեանին իր «ամբողջական եւ անվերապահ աջակցութիւնը» յայտնած էր վերընտրուելու հարցին մէջ՝ զայն բնորոշելով որպէս «մեծ բարեկամ եւ առաջնորդ», որ Հայաստանը կը դարձնէ «ուժեղ, հարուստ եւ շատ ապահով» երկիր։
Մոսկուան Հայաստանի մէջ սկսած է լայնածաւալ եւ ինտենսիւ ապատեղեկատուական արշաւ մը՝ ի նպաստ ռուսամէտ ընդդիմադիր թեկնածուներուն, ներառեալ Փաշինեանի դիրքերը տկարացնելու նպատակով իրականացուող քօղարկուած ջանքերը։
Արեւմտեան հետախուզական պաշտօնատարներու վկայակոչումով, Reuters-ը շաբաթ օր հաղորդեց, որ Մոսկուա կը ծրագրէ տասնեակ հազարաւոր հայ ընտրողներ տեղափոխել Ռուսաստանէն՝ ընտրութիւններու արդիւնքներուն վրայ ազդելու նպատակով»։
