«Ինչ ենք մենք ստանում, մենք ստանում ենք պետական սահման: Օրինականութեան հիմքերի վրայ մենք պէտք է ունենանք պետական սահման»։
Ազգային Ժողովին մէջ, կառավարութեան հետ հարցուպատասխանի ժամանակ արձագանգելով «Հայաստան» խմբակցութեան պատգամաւոր Լեւոն Քոչարեանի հարցումին՝ կապուած Տաւուշի հատուածին մէջ գիւղերուն հետ, այս մասին ըսաւ ՀՀ վարչապետ Նիկոլ Փաշինեանը։
«ՀՀ տարածքային ամբողջականութիւնը պաշտպանելը եւ վերականգնելը կառավարութեան օրակարգում է: Չեմ յոգնի ասել, որ սա Հայաստանի Հանրապետութիւնն է, եւ ես ՀՀ վարչապետն եմ, եւ պայմանաւորուածութիւնը, որ արձանագրուել է միջազգային մակարդակում, այն է, որ Հայաստանը եւ Ատրպէյճանը միմեանց տարածքային ամբողջականութիւնը պէտք է ճանաչեն: ՀՀ չի պատրաստւում որեւէ մէկին զիջել միջազգայնօրէն ճանաչուած ՀՀ տարածք», նշեց վարչապետը:
Կառավարութեան հետ հարցուպատասխանի ժամանակ ըսաւ վարչապետ Նիկոլ Փաշինեանը՝ արձագանգելով ԱԺ «Հայաստան» խմբակցութեան պատգամաւոր Գառնիկ Դանիէլեանի դիտարկման, թէ «լսել էր, որ կան դժբախտ ու տժգոյն քաղաքներ, լճեր ու սարեր, որ մեզ պէտք չեն, բայց չգիտէր, որ կան գիւղամիջեան ճանապարհներ, որոնք հարցականի տակ են»:
«Տանէիք այնտեղ կառուցեիք, Յունաստանում կղզի չառնէիք, գնայիք մի հիւրանոց էլ կառուցէիք Ոսկեպարում, երկու հատ էլ՝ Կիրանցում, էդ ճանապարհների երկայնքով կառուցէիք ձեր ավտոսալոնները: Խնդիրը տան մասին չէ, խնդիրը ՀՀ ինքնիշխան տարածքի մասին է: Այն, ինչը ՀՀ ինքնիշխան տարածքում է, ՀՀ ինքնիշխան տարածք է, կը ներէք, ես պատմական Հայաստանի վարչապետը չեմ, ես ՀՀ այսօրուայ վարչապետն եմ:
Եթէ պատմական Հայաստանի պատգամաւոր էք, առաջարկում եմ ձեր աշխատասենեակը տեղափոխել պատմական Հայաստան: Ձեր քաղաքական ուժը ունի բաւարար ֆինանսական ներուժ, գնացէք հիւրանոց, հիւրատուն կառուցէք: Ձեր հարցը աւելի շատ զգացական էր, եկէք բովանդակային քննարկենք: Մենք չենք խօսում ճանապարհը կառուցելու մասին, մենք խօսում ենք ՀՀ սահմանը սահմանազատելու մասին», նշեց Փաշինեան:
