Հնդկաստանը դէպի Հայաստան օդային միջանցք կը բանայ ռազմավարական նշանակութեան արտահանումներու համար: Այս մասին գրած է պաշտպանական ոլորտը լուսաբանող հնդկական հարթակներէն մէկը՝ IADN-ը, ու յաւելած՝ երկու մեծ ընկերութիւն համատեղ աշխատանքային խումբ հիմնած են, ինչ որ պիտի ամրապնդէ երկիրներուն միջեւ լոկիսթիքը։
Ընկերութիւններէն մէկը՝ Container Corporation of India-ն, մեծ բեռնափոխադրող է. միւսը՝ HAL-ը, օդագնացութեան ու պաշտպանութեան ոլորտին մէջ մասնագիտացած է, երկուքին բաժնեմասերն ալ պետութեան կը պատկանին։
CONCOR-ը նախօրէին X-ի պաշտօնական էջով շնորհաւորած է համատեղ խումբը դէպի Հայաստան իրականացուած առաջին թռիչքին համար՝ զայն Հնդկաստանի համար նշանակալի քայլ որակելով։ Ռազմավարական նշանակութեան բեռ տեղափոխած են Հայաստան, թէ յստակ ինչ, մանրամասնութիւններ չեն յայտներ։ Երեւանը եւս նման փոխադրումները չի բացայայտեր։
Իսկ ի՞նչ է օդային միջանցքը եւ ուրկէ՞ այն կ’անցնի. բառարանները այսպէս կը բացատրեն՝ այն երկու վայր միմեանց կապող օդային ուղի է՝ առանձնացուած սահմանափակ գօտի, որ հնարաւորութիւն կու տայ մարդոց կամ ռազմական բեռները մէկ տեղէն միւսը հասցնել։ Եզրը յաճախ մարդասիրական օգնութիւններ ուղարկելու ատեն կ’օգտագործեն։
Հրապարակուած լուսանկարին մէջ կ’երեւի՝ թռիչքը ռուսական օդային ընկերութիւններէն մէկուն բեռնափոխադրող ինքնաթիռով իրականացուած է։ «Հետք»-ը թռիչքներու առցանց ռատարով գտած է՝ ինքնաթիռը Իրանի օդային տարածքով հասած է Երեւան, վերջին 7 օրերուն երկու թռիչք իրականացուած է։
Անցեալ շաբաթ պաշտպանութեան նախարար Սուրէն Պապիկեանը Թեհրան կը գտնուէր, հանդիպեցաւ ե՛ւ իր իրանցի գործընկերոջը, ե՛ւ զինուած ուժերու շտաբի պետին, ե՛ւ նախագահին: Երեւանը ընդհանրական ձեւակերպումներով հաղորդեց, որ պայմանաւորուածութիւններ ձեռք բերած են, բայց փակագիծեր չբացաւ։ Պարզ չէ նաեւ՝ արդեօք Իրանի հետ քննարկուա՞ծ է ցամաքային փոխադրումներու հարցը, ու ինչպէ՞ս Թեհրանի մէջ արձագանգած են։
«Այս համագործակցութիւնը կրնայ երկար տեւել»
«Այստեղ ոչ մի զարմանալու բան չկայ, օրինակ՝ Ատրպէյճանի ու Իսրայէլի ռազմատեխնիկական գործակցութիւնն ամբողջը հէնց օդային ձեւով է գնում, ես չեմ տեսնում այստեղ ոչ մի նորութիւն, ու լաւ կը լինէր, որ, օրինակ, Հայաստանն էլ ունենար օդային ընկերութիւն, որ ունի մեծ, ասենք, փոխադրական ինքնաթիռներ, որ կարող են նաեւ հայկական ընկերութիւնները էդ ամէն ինչը անել», «Ազատութեան» հետ զրոյցին ըսաւ «Ապրի Արմէնիա» անկախ վերլուծական կեդրոնի ռազմական փորձագէտ Լէոնիտ Ներսիսեանը:
Հնդկաստանը Հայաստանին զէնք վաճառող հիմնական երկիրներէն դարձած է. վերջին տարիներուն հաղորդուած է շարժական ռատարներու, հրթիռային կայաններու, հրետանային համակարգերու եւ այլ զէնքերու վաճառքի մասին: Լէոնիտ Ներսիսեանը կ’ընդգծէ՝ այս համագործակցութիւնը կրնայ երկար տեւել:
«Հնդկաստանը այսօր արտադրում է արդէն համարեա ամէն ինչ, այդ իմաստով, դուք կարող էք ընտրել՝ ինչ էք ուզում գնել: Եթէ մենք վերցնենք, օրինակ, հրետանին, որ էլի հնդկական լրատուութեան մէջ նշւում է, մոտելները՝ MArG 155 ու ATAGS, MArG 155-ը լրիւ, ինձ թւում է, շատ սազական է Հայաստանի բանակին յատկապէս, որովհետեւ ինքը սարերի համար է նախատեսուած՝ հէնց Հիմալայներում գործելու համար, ու դա շատ աւելի ծանր միջավայր է, քան՝ մեր սարերը», նշեց ռազմական փորձագէտը:
Հայաստանը ռազմավարական ուղղութիւն է,- կը գրեն հնդկական աղբիւրները ու կը շեշտեն՝ այսպիսով ոչ միայն երկու երկիրներու առեւտրային կապերը կ’ամպապնդուին, այլեւ տարածաշրջանին մէջ Հնդկաստանի ազդեցութիւնը կը մեծնայ։
Ռուսաստանի հետ յարաբերութիւններու լարվածութեան զուգահեռ՝ Երեւանը զէնքի ձեռքբերումը բազմազանեցնելու մասին յայտարարած է, հայ պաշտօնեաները կ’ըսեն՝ Հնդկաստանն ու Ֆրանսան արդէն հիմնական գործընկերներ դարձած են։
«Ռազմական տեխնիկայի ձեռքբերումը, օրինակ, Ռուսաստանի Դաշնութեան հետ 96 տոկոսից իջել է 10 տոկոսից էլ ցած, եւ սա նշանակում է, որ Հայաստանը իրականացնում է բազմազանեցում եւ Հայաստանը գործընկերներ է ձեռք բերում ոչ միայն Արեւմուտքում, այլ նաեւ այլ տեղեր՝ Ասիայում, Հնդկաստանում, եւ տարբեր ուղղութիւններով», յայտնած է Հայաստանի Անվտանգութեան Խորհուրդի քարտուղար Արմէն Գրիգորեանը:
Աթէնքի հետ ռազմական ոլորտին մէջ գործակցութիւնը եւս կը խորացուի։ Յունաստանի պաշտպանութեան նախարարը Երեւանի մէջ չբացառեց Հայաստան-Յունաստան-Ֆրանսա-Հնդկաստան հնարաւոր համագործակցութիւնը։
