«Դեկտեմբերի 31-ին Հանրային հեռուստաընկերութիւնը ծրագրել էր հեռարձակել Ն.Ս.Օ.Տ.Տ. Ամենայն Հայոց կաթողիկոս Գարեգին Բ.-ի ուղերձը ամենադիտուող հատուածներից մէկում՝ պաշտօնական ուղերձների համար այս տարի առանձնացուած ժամին», այս մասին յայտնած են Հանրային Հեռարձակողի Խորհուրդէն։
«Կաթողիկոսի ելոյթը պէտք է յաջորդէր Սահմանադրութեամբ պետութեան գլուխ հանդիսացող ՀՀ նախագահի ելոյթին։ Ցաւօք, Դեկտեմբերի 31-ին Մայր Աթոռի անունից Տէր Վահրամ քահանայ Մելիքեանը Հանրային Հեռարձակողի Խորհրդին տեղեկացրել է, որ անհամաձայնութիւն են յայտնում ուղերձների համար նախատեսուած ժամի վերաբերեալ եւ պահանջում են չհեռարձակել եւ ընդհանրապէս չօգտագործել Կաթողիկոսի ուղերձի տեսագրութիւնը, որի հեղինակային իրաւունքները պատկանում են Մայր Աթոռին։ Քանի որ պահանջը միայն Հանրային հեռուստաընկերութեանն էր առնչւում, Խորհրդին ենթակայ «Շողակաթ» հեռուստաալիքը եւ Հանրային ռատիօն ուղերձը հեռարձակել են, իսկ Հանրային հեռուստաընկերութեան եթերի վերաբերեալ բանաւոր դիմումը բաւարարուել է։ Ամանորեայ ուղերձների հեռարձակման վերաբերեալ Հայաստանում չկայ օրէնսդրական կարգաւորում, եւ հէնց դա է պատճառը, որ իւրաքանչիւր հեռուստաընկերութիւն ինքն է որոշում, թէ երբ եւ ինչ հերթականութեամբ հեռարձակի ուղերձները, ինչն էլ տեղի է ունեցել։ Հաշուի առնելով հանրային լայն արձագանգքը՝ առաջարկում ենք խնդիրը կարգաւորել օրէնսդրական դաշտում։
Ափսոսում ենք այս միջադէպի համար եւ յոյս ունենք, որ այն որեւէ կերպ չի անդրադառնայ Հանրայինի եւ Մայր Աթոռի համագործակցութեան վրայ», ըսուած է Հանրային Հեռարձակողի Խորհուրդի տարածած յայտարարութեան մէջ։
Յիշեցնենք՝ Դեկտեմբեր 31-ին յայտնի դարձաւ, որ «Առաջին ալիքը» Գարեգին Բ.-ի ուղերձը պիտի չհեռարձակէ երկրի ղեկավարի ուղերձէն առաջ, ինչն արդէն աւանդոյթ դարձած էր։
