Ոստիկանութեան նախկին պետ Վլատիմիր Գասպարեանի դուստրը վերականգնած է պետութեան պատճառած վնասը. Ոչ-արդարացնող հիմքով՝ համաներմամբ, դադրեցուած է Եուլիա Գասպարեանի նկատմամբ յարուցուած հանրային քրէական հետապնդումը, տեղեկացուցած է Գլխաւոր Դատախազութիւնը։
Ըստ հաղորդման՝ այս տարուան Հոկտեմբերին Եուլիա Գասպարեանի պաշտպանը միջնորդութիւն ներկայացուցած է դատարան՝ արագացուած վարոյթ կիրառելու վերաբերեալ, Եուլիա Գասպարեանն ալ, միանալով միջնորդութեան, յայտնած է, որ համաձայն է իրեն ներկայացուած մեղադրանքին հետ:
Եուլիա Գասպարեանը կը մեղադրուէր պետական միջոցները վատնելուն օժանդակելու համար։
Ան 2015-ի Մարտին նշանակուած է պաշտօնի Հայաստանի ոստիկանութեան զօրքերուն մէջ եւ պաշտօնավարած է մինչեւ 2018-ի Մայիս 10։
Վլատիմիր Գասպարեանի դուստրը, ըստ դատախազութեան, այդ ընթացքին օժանդակած է այդ ժամանակ ոստիկանութեան զօրքերու հրամանատար Լեւոն Երանոսեանին, որ վատնած է պիւտճէի գումարները, զանոնք որպէս աշխատավարձ, արձակուրդային եւ պարգեւատրումներ ձեւակերպած եւ փոխանցած է մէկ օր նոյնիսկ աշխատանքի չներկայացած իր աշխատակիցին՝ Եուլիա Գասպարեանին։
Ըստ դատախազութեան՝ Եուլիա Գասպարեանին երեք տարուան մէջ փաստացի վճարուած է 8 միլիոն 838 հազար դրամ։