Հրետանային համակարգերու արտադրութեամբ զբաղող հնդկական Bharat Forge ընկերութիւնը հաստատած է, որ վերջերս ցուցադրուած «MArG 155» անուաւոր ինքնագնաց հաուպիցները նախատեսուած են Հայաստանի համար: Այս մասին կը հաղորդէ idrw.org-ը (Indian Defense Research Wing):
Հաղորդագրութեան համաձայն՝ «MArG 155»-ը արդիական հրետանային համակարգ է, որուն մէջ միաւորուած են հզօրութիւնը, ճշգրտութիւնը եւ շարժունակութիւնը: 155 միլիմեթր/39 տրամաչափի թնդանօթով, քարշակող 4 անիւներով համակարգը բացառիկ մանեւրականութիւն կ’ապահովէ որեւէ տեղանքի մէջ: Մինչեւ 30 աստիճան անկիւնները յաղթահարելու, «կրակել եւ փախչելու» կարողութիւնները զայն կը դարձնեն ընդհանրական եւ ահեղ զէնք մարտական ժամանակակից բեմագրութիւններուն մէջ, նշուած է հաղորդագրութեան մէջ:
«Հայաստանի հետ գործարքը հիմնուած է երկու երկիրներու միջեւ ռազմավարական համագործակցութեան վրայ, ինչով Հնդկաստանը պաշտպանական սպառազինութեան առանցքային մատակարար դարձած է Հայաստանի համար: 2020 թուականին Հայաստանը Հնդկաստանէն ձեռք բերած է 4 միաւոր «Swathi» շարժական ռատարներ, եւ 2022 թուականի Սեպտեմբերին «Pinaka» բազմափող հրթիռային կայաններու, հակահրասայլային հրթիռներու եւ տարբեր տեսակի զինամթերքի ձեռքբերման 245 միլիոն տոլարի պայմանագիր ստորագրուած է», կը փոխանցէ հնդկական պարբերականը: