«Ընդհանրապէս տրամաբանութիւն չկայ այն պնդման մէջ, թէ Հայաստանը հակառուսական գործիք է, չկայ որեւէ փաստ դրա մասին վկայող եւ չի կարող լինել որեւէ արժանահաւատ վերլուծութիւն»:
Այս մասին Հանրային հեռուստաընկերութեան եթերով ըսած է ՀՀ Ազգային Ժողովի փոխնախագահ, Թուրքիոյ հետ բանակցութիւններուն ՀՀ ներկայացուցիչ Ռուբէն Ռուբինեանը:
Ան նկատած է, որ Հայաստանի Հանրապետութիւնը իրեն միշտ դուրս դրած է աշխարհաքաղաքական բախումներէ, այդ եղած է ե՛ւ 2018-էն առաջ, ե՛ւ յետոյ: Հայաստանի Հանրապետութիւնը իր բոլոր դաշնակցային պարտաւորութիւնները միշտ կատարած է:
Ռուբինեան նաեւ ըսած է՝ սխալ պնդում է, թէ Հայաստանը ԵՄ դիտորդական առաքելութիւնը գերադասած է ՀԱՊԿ առաքելութենէն:
«ԵՄ դիտորդների ժամանելու վերաբերեալ որոշումը կայացուել է 2022-ի Հոկտեմբերին՝ Փրակում քառակողմ հանդիպման ժամանակ, եւ այդ պահի դրութեամբ ՀԱՊԿ խաղաղապահների թեմա գոյութիւն չունէր: Դրանից առաջ կարճաժամկէտ առաքելութիւն եկել եւ գնացել էր: Այսինքն՝ մեր առջեւ երբեք դրուած չի եղել ընտրութիւն՝ ընտրել ԵՄ, կամ ՀԱՊԿ դիտորդների: ՀԱՊԿ դիտորդների թեման բացուել է դրանից յետոյ, եւ ՀԱՊԿ առաքելութիւնը նոյնպէս չի մերժուել: Հայաստանը ՀԱՊԿ անդամ է, երբ տեղի է ունեցել Հայաստանի վրայ յարձակում, Հայաստանը արդարացիօրէն ակնկալել է 2 բան, որ պիտի հաստատուի, որ ՀՀ ինքնիշխան տարածքի վրայ յարձակում է տեղի ունեցել, երկրորդը՝ դա պիտի դատապարտուի, եւ լաւ կը լինէր, որ աջակցութիւն էլ լինէր. իմ նշած 3 կէտերից ոչ մէկը տեղի չի ունեցել», ընդգծած է ԱԺ փոխխօսնակը:
Անդրադառնալով այն պնդումներուն, թէ փրակեան հանդիպումը պէտք էր չեղարկել՝ Ռուբինեան արձագանգած է. «Փրակեան հանդիպման ընթացքում ի՞նչ է եղել, որ պէտք է չեղարկել: Այդ պնդումը անում է ընդդիմութիւնը, այդ պնդումը արել է նաեւ ՌԴ ԱԳՆ-ն, թէ իբր Լաչինի միջանցքի ապօրինի շրջափակումն արդիւնք է Փրակում տեղի ունեցած պայմանաւորուածութեան, եւ նոյնն էլ ասում է ընդդիմութիւնը: Փրակում այն բանից յետոյ, երբ Սեպտեմբերին տեղի էր ունեցել ՀՀ ինքնիշխան տարածքի վրայ ատրպէյճանական յարձակումը, որը չէր դատապարտուել անգամ ՀԱՊԿ-ի կողմից, դրանից յետոյ Հայաստանի վարչապետը եւ Ատրպէյճանի նախագահը Փրակում արել են ընդամէնը մէկ բան, որը նոր բան չէ, վերահաստատել են, որ կողմերը 1991 թուականի Ալմա-աթայի հռչակագրի հիման վրայ ճանաչում են միմեանց տարածքային ամբողջականութիւնը»:
Ըստ Ռուբինեանի՝ 2022 թուականի Հոկտեմբերին վերահաստատուած է այն, ինչ տեղի ունեցած է 1991 թուականին, եւ անոր միացած եւ ստորագրած են ե՛ւ Ռուսաստանը, ե՛ւ Ատրպէյճանը, ե՛ւ Հայաստանը. «Հետեւաբար Հոկտեմբերին վերահաստատուած բանը, որը տեղի էր ունեցել 30 տարի առաջ, չէր կարող լինէր պատրուակ Նոյեմբերի 9-ի յայտարարութեան ամրագրուած պարտականութիւնների չկատարման համար»: