Կայացած է ՀՀ Կրթութեան, Գիտութեան, Մշակոյթի եւ Մարմնակրթութեան Նախարարութեան փորձագիտական յանձնաժողովի ընթացիկ տարուան երրորդ նիստը. Շարք մը պատմամշակութային կառոյցներ նորայայտ յուշարձանի կարգավիճակ ստացած են:
Քննարկումներու բերումով յանձնաժողովի անդամներուն դրական եզրակացութեամբ նորայայտ յուշարձանի կարգավիճակ ստացած են Երեւանի եւ հանրապետութեան հինգ մարզերու մէջ գտնուող 11 պատմամշակութային կառոյցներ:
Տեղական նշանակութեան յուշարձանի կարգավիճակ ստացած են Երեւան քաղաքի Շէնգաւիթ վարչական շրջանի «Հայրենիք» կինոթատրոնի շէնքը, որ կառուցուած է 1951 թ. (ճարտ. Գր. Աղաբաբեան), Քանաքեռ-Զէյթուն վարչական շրջանին մէջ գտնուող ՀՀ ԳԱԱ Հրաչեայ Բունիաթեանի անուան Կենսաքիմիագիտութեան հիմնարկի շէնքի գլխաւոր ճակատը զարդարող «Ծիլ եւ արեւ» (1970 թ.) (հեղինակ՝ Կ. Եղիազարեան, համահեղինակներ՝ Մ. Քամալեան, Ց. Ազիզեան) խճանկարը:
Յուշարձանի կարգավիճակ ստացած եւ պետական պահպանութեան վերցուած միւս յուշարձաններն են Արագածոտնի մարզի Արուճ գիւղի Սբ. Գրիգոր եկեղեցական համալիրի տարածքին գտնուող եռանաւ սրահը (վաղ միջնադար, V-VI դդ.), Մելիքգիւղ գիւղի Դամբարանադաշտը (վաղ պրոնզեդար, Ք. ա. III հազ., ուշ պրոնզ-վաղ երկաթ), Արմավիրի մարզի Բագարան գիւղի Երուանդակերտ քաղաքատեղին ((դաստակերտ) Ք.Ա. 3-րդ դ.– Ք.Ե.. 14-րդ դ.), ապարանքը (Ք.Ա. III դ.- Ք.Ե. IV դ.) եւ նոյն մարզի Խանճեան գիւղի դամբարանադաշտը (Ք. Ա. II-I հազ.), Գեղարքունիքի մարզի Արտանիշ գիւղի Արտանիշ- 9 բնակատեղին (վաղ պրոնզի դարի II փուլ, Ք.Ա. 28-26-րդ դդ.) եւ Արտանիշ- 9 դամբարանադաշտը (Ք.Ա. 24-23-րդ դդ.), Սիւնիքի մարզի Տոլորս գիւղի Սբ. Հռիփսիմէ միանաւ պազիլիկ եկեղեցին (1861 թ.), Վայոց ձորի մարզի Չիվա գիւղի ժայռափոր (վիմափոր) ջրաղացը (XIII-XIV դդ.):
Հանդիպման ընթացքին քննարկուած են նաեւ պատմութեան եւ մշակոյթի 32 անշարժ յուշարձաններու պահպանական գօտիներու նախագիծերը: Ըստ սահմանուած կարգի՝ անոնք պիտի ուղարկուին համայնքներու ղեկավարներու եւ տարածքային կառավարման պետական մարմիններու համաձայնեցման: Ներկայացուած եւ յանձնաժողովի հաւանութեան արժանացած է Լոռիի մարզի Ակներ գիւղի քարայր-կացարաններոգ համալիրը (10-19-րդ դդ.) օգտագործման յանձնելու ծրագիրը:
