Ուաշինկթընը Հայաստանի եւ Ատրպէյճանի միջեւ համաձայնագիրը հասանելի կը համարէ՝ չնայած երրորդ երկիրներու մեկնաբանութիւններուն։
Այս մասին ճեպազրոյցի ընթացքին յայտնած է Պետական Քարտուղարութեան ներկայացուցիչ Մեթիու Միլլըրը՝ մեկնաբանելով Ռուսաստանի Դաշնութեան յայտարարութիւնները հայ-ատրպէյճանական յարաբերութիւններու կարգաւորման հարցով Արեւմուտքի միջնորդութեան վերաբերեալ։
«Ես չեմ ուզեր խօսել Ռուսաստանի մասին, երբ խօսքը Հայաստանի եւ Ատրպէյճանի մասին է: Ես կ’ուզեմ խօսիլ այն երկու երկիրներուն մասին, որոնք անմիջականօրէն կապուած են, եւ որոնք անմիջական կողմեր են այս վէճին մէջ: Մենք ուղիղ կերպով շփուած ենք այդ երկիրներուն հետ: Յատուկ բանագնաց Պոնօն անցեալ շաբաթ այցելած է տարածաշրջան եւ անմիջականօրէն համագործակցած է անոնց հետ: Եւ մենք կը համարենք, որ չնայած այլ երկիրներու մեկնաբանութիւններուն, որոնք այս հարցով կողմ չեն, համաձայնութիւնը կը մնայ հասանելիութեան սահմաններուն մէջ», ըսած է Միլլըր։
Ան ընդգծած է, որ Ուաշինկթըն պիտի շարունակէ աշխատիլ կողմերուն հետ՝ համաձայնութեան հասնելու համար։