Աշխատանքային այցով ԱՄՆ գտնուող ՀՀ Զինուած Ուժերու Գերագոյն Շտաբի պետ, պաշտպանութեան նախարարի առաջին տեղակալ, զօրավար-լեյթենանթ Էտուարտ Ասրեանը Յուլիս 17-18-ին մայրաքաղաք Ուաշինկթընի մէջ մասնակցած է ԱՄՆ Ազգային պաշտպանութեան նահանգային համագործակցութեան ծրագրի 30-ամեակին նուիրուած համաժողովին:
Միջոցառման ընթացքին, Ասրեան հանդիպումներ ունեցած է ԱՄՆ Ազգային պաշտպանութեան բիւրոյի պետ, զօրավար Տանիէլ Հոքանսընի, ԱՄՆ Եւրոպական հրամանատարութեան ռազմավարութեան, ծրագրաւորման եւ քաղաքականութեան հարցերով տնօրէն, զօրավար-մայոր Տանիէլ Լասիքայի եւ Քանզաս նահանգի ատյութանթ զօրավար, Ազգային պաշտպանութեան հրամանատար, զօրագունդի զօրավար Մայքըլ Վեներտիի հետ:
Հանդիպումներու ընթացքին քննարկուած են նահանգային գործընկերութեան շրջանակներուն մէջ Հայաստան-Քանզաս համագործակցութեան ներկայ մակարդակը եւ զարգացման հեռանկարները, ԱՄՆ-ի հետ երկկողմ համագործակցութեան առնչուող շարք մը հարցեր։
Նոյն օրը զօրավար-լեյթենանթ Էտուարտ Ասրեանը հանդիպում ունեցած է նաեւ Կիպրոսի պաշտպանութեան նախարար Միխալիս Կիորկալասի եւ Ազգային պաշտպանութեան գլխաւոր շտաբի պետ, զօրավար-լեյթենանթ Տիմոքրիթոս Զերվաքիսի հետ։ Քննարկուած են երկկողմ համագործակցութեան առնչուող շարք մը հարցեր։