Բացայայտուած են խումբ մը անձերու կողմէ նախնական համաձայնութեամբ առանձնապէս մեծ չափերով թմրամիջոց իրացնելու եւ առանձնապէս մեծ չափերով թմրամիջոցի մաքսանենգութիւն կատարելու դէպքեր, կը հաղորդէ Հայաստանի Ազգային Անվտանգութեան Ծառայութիւնը:
ԱԱԾ մամուլի կեդրոնին փոխանցմամբ` ծառայութեան քննչական գլխաւոր վարչութեան մէջ, Մայիս 13-ին նախաձեռնուած եւ իրականացուող քրէական վարոյթի նախաքննութեամբ պարզուած է, որ Հայաստանի մէջ գործող եւ միրգերու ներմուծմամբ զբաղող ընկերութեան կողմէ Էքուատորի մէջ գտնուող ընկերութենէն պատուիրուած ապրանքատեսակին հետ տարանցիկ երկիրներու` Փանամայի, Իտալիոյ եւ Վրաստանի տարածքով Հայաստան ներմուծուած է «քոքային» տեսակի շուրջ մէկ թոն քաշով թմրամիջոց (շուրջ 250 միլիոն եւրօ արժողութեան), որ յայտնաբերուած է եւ կը գտնուի ԱԱԾ-ին մօտ:
Հայկական կողմին հաղորդագրութիւնը կը յաջորդէ իտալական ոստիկանութեան բացայայտման, երբ պարզուեցաւ, որ իտակալան նաւահանգիստին մէջ յայտնաբերուած 2,7 թոն քոքայինը պանանի արկղերով Էքուատորէն պէտք է տեղափոխուէր Հայաստան:
